Củ tịc Quốk hội ồng Vương Đình Huệ đơs niam gơnoar broă bơh đại sứ dê tàm tơngai do neh geh uă broă pơgồp bal nàng lơh pràn rơlao tai tàm bơta git gơ̆p lơh bơyô dờng màng, tam klăc bal dờng màng, lơh broă bal tơl ală bơta, mìng geh dùl lơm tàm dunia đơs bal mờ bơta git gơ̆p đah bàr Quốk hội đơs is.

Kwơ màng, bơdìh mờ kơrnoăt dơ̆ tìp bal sùm pah nam đơs bal mờ bơta git gơ̆p đah bàr Ƀộ Cíñ trị mờ dơ̆ pơrjum bè ờs pah nam bơh bàr Ủy ƀan lơh broă bal bàr Cíñ phủ bơh bàr lơgar den pa do, “Dơ̆ tìp bal dờng đah lơgar Việt Nam – Campuchia – Lào” đah Kwang đơng lam pe Đảng neh geh bơyai lơh geh cồng nha ngan. Bơdìh hơ̆ tai, bàr gah neh geh uă kơrnoăt pa geh lơh. Tàm hơ̆ geh kơrnoăt đah pe Củ tịc Quốk hội Campuchia-Lào-Việt Nam geh bơyai lơh Pơrjum kấp dờng Quốk hội CLV dơ̆ sơnrờp tàm lơgar Lào lồi nam do. Di tàm dơ̆ do, Củ tịc Quốk hội ưn ngài Quốk hội lơgar Lào neh ai mpồl kwang bàng tus Pơrjum Nghị sĩ kơnòm să gùt plai ù dơ̆ 9 geh Quốk hội lơgar Việt Nam bơyai lơh; tơlik nùs nhơm chờ hờp tŭ Quốk hội lơgar Lào là lơgar dờp bơyai lơh AIPA nam 2024 neh bal mờ Tổng Thư ký AIPA tìp măt ală nghị sĩ kơnòm să AIPA tàm pơrjum pa do.