VOV4.K’ho - Mho mờ mang ngai òr (12/05), Củ tịc Quốk hội ồng Vương Đình Huệ wă mò Viêng Thoong Sỉ-Phẳn-Đon, Kang atbồ anih cah rơña làng bol dờng rơlao jơh lơgar Lào còp mùl màl lơgar Việt Nam.

Củ tịc Quốk hội đơs tờm, dơ̆ tus còp do geh kwơ màng ngan tàm bơta bàr lơgar gam rơcang tơnkah ngai crơng gơs broă lơh git gơ̆p, lơh broă bal mờ ngai kĭ Hiệp ướk lơh bơyô bal mờ lơh broă bal đah lơgar Việt Nam mờ lơgar Lào. Ală dơ̆ tam gơl mpồl kwang bàng dờng màng đah bàr lơgar gam lơh jăt niam; mờ kơ̆p kờñ tàm gơnoar broă pa, mò geh lơh jăk chài kơnòl, bal mờ Anih cah rơña làng bol dờng rơlao jơh lơgar Việt Nam geh pơgồp bal nền nòn, chồl pràn rơlao tai broă lơh git gơ̆p đah bàr lơgar. Củ tịc Quốk hội kơ̆p kờñ, Anih cah rơña bàr lơgar tơnguh ală cồng nha neh lơh geh, tơnguh sùm cồng nha broă lơh tàm tơngai tus. Mờ gơnoar broă bơh să tờm dê, Củ tịc Quốk hội kờñ bal mờ dong kờl nàng bàr anih lơh broă pơn jăt tai tơnguh broă lơh bal tàm tơngai tus.

Cau mblàng Ndong Brawl