VOV4.K’ho - Mho mờ mang òr (06/09), tàm hìu Quốk hội, Củ tịc Quốk hội ồng Vương Đình Huệ neh wă Kwang geh jơng tàm mpồl đơng lam Đảng Làng bol lơgar Campuchia (CPP), Kwang atbồ Càr lơgar Phnom Penh ồng Khuông Sơ-reng lam bồ Mpồl kwang bàng kấp dờng càr lơgar Phnom Penh tus còp mờ lơh broă tàm càr lơgar Hà Nội.

Củ tịc Quốk hội ồng Vương Đình Huệ wă ồng Khuông Sơ-reng, Kwang atbồ càr lơgar Phnom Penh, lơgar Campuchia

Củ tịc Quốk hội ồng Vương Đình Huệ wă Mpồl kwang bàng ala măt kấp dờng càr lơgar Phnom Penh, lơgar Campuchia

Củ tịc Quốk hội ồng Vương Đình Huệ đơs, gùng dà lài mờ tơnơ̆ bơh Đảng, Dà lơgar Việt Nam dê sùm sền kwơ broă lơh “Rềp bal niam bơnĕ, git gơ̆p bal ờs mờng, lơh broă bal tơl ală bơta, kơl jăp jŏ jòng” mờ lơgar Campuchia tàm jơh ală gah broă Đảng, Cíñ phủ, Quốk hội. Tàm bơta nam 2022 geh kwơ màng là nam git gơ̆p, lơh bơyô bal đah lơgar Việt Nam mờ lơgar Campuchia, tơnkah 55 nam ngai crơng gơs bơta git gơ̆p cri bơyai broă lơh bal mờ lơgar ndai đah bàr lơgar, Củ tịc Quốk hội sồr bàr càr lơgar pơn jăt tai cri bơyai ring bal mờ chồl pràn ală broă tìp bal, ală broă lơh, lơh broă bal, tam pà bal broă mờng chài tàm uă gah broă bè lơh sa, kă bro, bơcri priă, nhơl chờ; kơ̆p kờñ, Kwang atbồ càr lơgar Phnom Penh sền gròi, ai tơl bơta niam ală mpồl lơh sa kă bro, làng bol lơgar Việt Nam gam ơm kis, lơh broă tàm ù tiah lơgar Campuchia.

Cau mblàng Ndong Brawl