VOV4.K’ho- Mho ngai 07/09, tàm Hìu Quôk hội, Củ tịc Quôk hội ồng Vương Đình Huệ neh wă mpồl Sền swì kờp dŭ priă jền Dà lơgar Lào bơh ồng Viengthavisone Thephachanh, Kwang ătbồ Sền swì kờp dŭ priă jền Dà lơgar Lào lam bồ neh lòt còp mờ lơh broă tàm lơgar he.

Tàm dơ̆ wă, Củ tịc Quôk hội ồng Vương Đình Huệ đơs niam ngan kwang đơng lam bồ anih lơh broă sền swì kờp dŭ priă jền bàr lơgar dê neh geh dơ̆ cribơyai geh cồng nha, mờ pà gĭt bal mờ bơta gĭt gơ̆p dờng màng mìng geh dùl lơm đah Việt Nam mờ Lào dê den anih lơh broă sền swì kờp dŭ priă jền bàr lơgar dê kung neh geh bơta lơh broă bal tàm dong kờl bal mờ gơ̆p jơh nùs ngan jăt tàm bơta mờr ndrờm bal bè broă bơyai lơh.

Củ tịc Quôk hội kơ̆p kờñ bàr anih lơh broă Quôk hội geh pơn jăt tai cribơyai bơta mờng chài bè rơndăp broă mờ broă lơh bơh sền swì kờp dŭ priă jền dà lơgar dê, gàr niam bơta krơi is bè broă lơh ờs mờng, lơh niam ngan rlau jơh gơnoar broă, kơnòl broă bơh anih lơh broă lùp sền bè priă jền jơtài dà lơgar geh bơngă pin dờn mờ kơnòl tềng đăp Đảng mờ Làng bol.

Cau mblàng Lơ Mu K’Yến