Wă Tập đoàn TCL, ồng Wang Cheng, Kwang atbồ đơng lam Tập đoàn pà gĭt, tàm lơgar Việt Nam, TCL neh bơcri lơh 3 nơm hìu măi lơh gơlik phan tàm Bình Dương mờ Quảng Bình mờ kờp jơh priă bơcri rlau 100 tơlak dolar Mỹ mờ bơta pràn lơh geh 6 tơlak tấn phan bơna dùl nam. Tàm tơngai tus, Tập đoàn TCL rơ̆p rề ơnàng lơh rơndăp broă lơh neh mut lơh broă mờ lơh ală hìu măi pa, yal tơngĭt ală cau tăc blơi phan tus mờ lơgar Việt Nam, nàng lơh sir ală broă lơh tăc bro phan. Củ tịc Quôk hội ồng Vương Đình Huệ jờng rơ uă ngan bồ tơngoh tơlik mat ală anih lơh broă tăc bro phan bơh TCL dê tàm lơgar Việt Nam.

Tàm dơ̆ wă ồng Trương Thiên Nhiệm, Củ tịc mơkung là Ƀí thư Đảng ủy Tập đoàn mờ ală kwang bàng tàm mpồl kwang bàng kấp dờng ndai bơh Tập đoàn Tianneng, Củ tịc Quôk hội jờng rơ tập đoàn sac rơwah lơgar Việt Nam là tiah tus bơcri priă, kơ̆p kờñ rơndăp broă lơh gờñ mut lơh broă, tă pơgồp tàm bơta bơtàu tơnguh bơh ală tiah dê kung bè lơgar Việt Nam dê, sơlơ tơnguh bơta gĭt gơ̆p lơh broă bal bè kă bro phan, bơcri priă đah lơgar Việt Nam mờ Lo.