Tàm do, Củ tịc Quôk hội neh wă rò Kwang ătbồ ƀòn dờng Burgas ồng Dimitar Nikolov mờ ală Phó Kwang ătbồ ƀòn dờng, kwang đơng lam bồ ală Mpồl lơh broă bơh ƀòn dờng dê. Củ tịc Quôk hội đơs nền, tàm rlau 73 nam do, lơgar Việt Nam sùm ki ngàm bơta dong kờl, kờñ bal bơh lơgar Bulgaria dê đơs bal mờ bơh ƀòn dờng Burgas dê đơs is.

Tàm dơ̆ lòt còp ngan ngồn dơ̆ do, mờ tàm ală dơ̆ pơrjum tàm cribơyai mờ Củ tịc Quôk hội, Kwang ătbồ lơgar mờ Thủ tướng, bal mờ ală dơ̆ tìp măt ndai, bàr gah ndrờm ring bal sơlơ tơnguh gĭt gơ̆p, lơh broă bal tàm jơh ală gah Đảng, Cíñ phủ, Quôk hội, tìp măt lơh kwèng bal làng bol mờ làng bol, ƀòn lơgar mờ ƀòn lơgar. Củ tịc Quôk hội ồng Vương Đình Huệ neh yal mờ Kwang ătbồ ƀòn dờng Burgas in bè càr Quảng Ninh tŭ do, do là dùl tàm ală tiah geh bơta bơtàu tơnguh mhar ngan bơh lơgar Việt Nam dê; pà gĭt, tơnơ̆ dơ̆ lòt còp do rơ̆p sồr càr Quảng Ninh gờñ lơh wơl ală broă lơh đah 2 gah; mơkung jà Kwang ătbồ ƀòn dờng mờ ală kwang bàng lòt còp lơgar Việt Nam, còp càr Quảng Ninh nàng kờñ tơnguh bơta gĭt gơ̆p đah 2 tiah, ngan là tàm gah lòt nhơl.