VOV4.K’ho- Mho mang ngai 16/03, tàm Hìu Quôk hội, Củ tịc Quôk hội ồng Vương Đình Huệ neh wă rò ồng Julius Maada Bio, Kwang ătbồ lơgar Sierra Leone di dơ̆ ồng lòt còp ngan ngồn lơgar Việt Nam bơh ngai 14- 20/03 do.

Tàm dơ̆ wă rò, Củ tịc Quôk hội ồng Vương Đình Huệ đơs nền, Quôk hội Việt Nam geh gùng dà broă lơh pờ ơnàng, sơlơ tơnguh lơh broă bal mờ Nghị viện ală lơgar tàm jơh ală kơnhoàl ù tiah tàm gùt dunia, geh bal tàm mpồl lơh broă bal nghị viện 2 gah mờ uă gah. Mờ ală lơgar tàm ù tiah câu Phi, Quôk hội Việt Nam gàr sùm broă tìp măt mờ Nghị viện, Nghị sĩ ală lơgar, sơlơ tơnguh lơh broă bal Nghị viện, crơng gơs Mpồl Nghị sĩ gĭt gơ̆p lơh bơyô bal mờ Nghị viện uă lơgar bơh hơ̆ sơlơ tơnguh bơta gĭt gơ̆p lơh sa, kă bro, bơcri priă, niam chài mờ bơto bơtê đah 2 gah. Đơs sùm, Quôk hội Việt Nam geh gơnoar broă kwơmàng tàm broă đơng lam dà lơgar, Kwang ătbồ lơgar Sierra Leone dùl nùs bal mờ Củ tịc Quôk hội Việt Nam là anih lơh broă lơh gơs adat boh lam bơh 2 lơgar dê sơlơ lơh broă bal, tàm yal tơngĭt bal mờ tơnguh bơngă bơta gĭt gơ̆p.

Cau mblàng Lơ Mu K’Yến