Nam 2024 mờ tàm 3 nam bơh chờm lam lơh Nghị quyết Pơrjum dờng Đảng ală kấp, càr Bình Định neh tơrgùm lam lơh jat kràñ cê jơh nùs, dùl ròt bal ală broă lơh bơtàu tơnguh lơh sa- mpồl bơtiàn, gàr niam lơngăp lơngai Dà lơgar- lơngăp lơngai, bơt bơtàu ală anih lơh broă cíñ trị tàm ù tiah do dê mờ neh lơh geh ală cồng nha niam ngan. Tus tŭ do geh 16 tàm 22 broă jàu uă ngan bơh tơngai lơh broă bơh nam 2020 - 2025 lơh geh mờ sơr lèt broă rơndăp lơh geh ai. Kờp jơh phan bơna ală tiah dê gơguh 7,6%, ơm dơ̆ 17 tàm 63 tàm gùt lơgar. Lơh sa dờng kờp dŭ lơh geh rlau 117 rơbô tơmàn đong, ơm dơ̆ 5 tàm 14 tàm tiah tàm gùl lơgar...

Đơs tàm dơ̆ lơh broă, Củ tịc Quôk hội Vương Đình Huệ jờng rơ ală cồng nha mờ càr Bình Định neh lơh geh pơgồp bơnah ai rài lơh sa pơn jat tai bơtàu tơnguh wơl mờ gơguh lơh sa, ơm tàm mpồl lam lài bơh tiah do dê. Tàm tơngai tus, càr Bình Định pơnđơl pràn lơh ngan lơh geh jơnau kờñ tus nam 2030 gơ gơs càr bơtàu tơnguh gơwèt mpồl lam lài tiah đah Tô tàm gùl lơgar mờ tiah jat kềng gah dà lềng tàm gùl lơgar dê; anih tờm dờng bơh gùt lơgar dê bè bơtàu tơnguh lơh sa dà lềng; tiah tờm lòt nhơl Dà lơgar. Củ tịc Quôk hội sồr càr Bình Định pơnđơl pràn lơh ngan, lơh ngan lơh sir uă ngan rlau jơh ală jơnau kờñ, kơnòl broă neh geh ai, kơ̆p kờñ mờ pin dờn là, Đảng ƀộ, gơnoar atbồ mờ làng bol càr Bình Định rơ̆p pơn jat tai yờ tơnguh uă nùs nhơm mờ nùs pơn yờ să “Tây Sơn”, gờñ lơh gơs ngan ngồn bơta kơ̆p kờñ, jơnau kờñ tus nam 2030, càr Bình Định gơ gơs càr bơtàu tơnguh gơwèt mpồl lam lài tiah đah tô tàm gùl lơgar mờ tiah jat kềng gah dà lềng tàm gùl lơgar.

Tàm dơ̆ lòt còp dơ̆ do, Củ tịc Quôk hội Vương Đình Huệ neh hòi jà Tổng Kông ty Gùng dà lềng lơgar Việt Nam dong kờl càr Bình Định lơh 100 nơm hìu ơm bơta nđàc mờ kờp jơh khà priă 5 tơmàn đong.