Củ tịc Quốk hội ồng Vương Đình Huệ mờ mò Megawati ring bal tàm tơngai tus, ală anih lơh broă geh gơrềng bơh lơgar Việt Nam mờ Indonesia pal rcang lài đơs ală broă lơh geh cồng nha mờ geh ngan nàng kờñ sơlơ tơnguh rlau tai bơta gĭt gơ̆p lơh broă bal đah 2 lơgar tàm jơh ală gah broă, ală gah, ală kấp, ngan là gah Đảng tài bơh do ngan là bơnàng jă nàng 2 lơgar in pơn jat tai bơtàu tơnguh bơta gĭt gơ̆p lơh bơyô bal, rềp mềl bal mờ lơh broă bal jŏ jòng.

Bàr gah ring bal sơlơ tơnguh lơh broă bal đah ală anih lơh broă kơlôi sơnơng, jơnau tàm sră pơ àr bơh 2 lơgar dê, ngan là đah Anih lơh broă jơnau tàm sră pơ àr bồ tơngoh Pancasila mờ Anih lơh broă Kơlôi sơnơng mờ Bơceh lơh dà lơgar bơh lơgar Indonesia bơh mò Megawati lơh Củ tịc mờ Mpồl duh broă jơnau tàm sră pơ àr Dà lơgar dê, Viện Hàn lâm Khoa họk Xã hội Việt Nam, Viện Hàn lâm Khoa họk mờ Kông nghệ. Di dơ̆ do, Củ tịc Quôk hội ồng Vương Đình huệ jơh nùs pơyoa jơnau bơh Tổng Ƀí thư ồng Nguyễn Phú Trọng mờ ală kwang đơng lam bồ kấp dờng lơgar Việt Nam dê jà mò Megawati còp lơgar Việt Nam. Mò Megawati chờ hờp dờp jơnau jà mờ đơs nền rơ̆p gờñ lòt còp lơgar Việt Nam.