Đơs tàm dơ̆ tìp mat, Củ tịc Quôk hội kơ̆p kờñ ală cau ala mat cau geh bồ tơngoh bơsram sră, cau kơ đơng yàng, cau jơi bơtiàn dồ êt nă cau geh pơn rơ jak bơh càr lơgar Hà Nội dê rơp tơnguh rlau tai gơnoar broă he dê, là ală cau tờm tàm tơl srơh; lơh gơ rề uă, ai tơlik lài gùng dà, mblàng wơl bơta kờñ gơboh ai ală mpồl lơh broă mpồl bơtiàn ndai in, ngan là ai rơnàng kơnòm să in, pơgồp bơnah jơh nùs tàm broă bơtàu tơnguh bơh càr lơgar Hà Nội mờ bơh gùt lơgar dê.

Củ tịc Quôk hội jờng rơ jơnau bơceh lơh bơh Ủy ƀan Mặt trận dà lơgar ƀòn dờng Hà Nội mờ Kwang đơng lam bồ ƀòn dờng Hà Nội dê neh lam lơh Gùng lòt tàm tơrbŏ bal bơh Mpồl cau ala mat cau geh bồ tơngoh bơsram sră, cau kơ đơng yàng, cau jơi bơtiàn dồ êt nă cau mờ đơs là, dơ̆ tìp mat do bềng lìu nùs nhơm tam klac dờng jơh gùt jơi bơtiàn, do là bơhiàn ờs mờng kuơmàng ngan jơi bơtiàn he dê, là cơng tàng ai bơta ring bal bồ tơngoh mờ broă lơh, jơnau git wă kơnòl boă bơh ală làng bol càr lơgar pơn rơ jak dê, tài bơta bơtàu tơnguh bal bơh ƀòn dờng Hà Nội mờ gùt lơgar dê.