VOV4.K’ho- Mho mang ngai 11/08, tàm Hìu Quôk hội, Củ tịc Quôk hội ồng Vương Đình Huệ neh tus bal Cribơyai tă pơgồp jơnau đơs tàm jơnau rơcăng cih tơngume pal jăt dơ̆ pơrjum Quôk hội dê (tam gơl) bơh Viện Kơlôi sơnơng lơh adat boh lam mờ Cơldŭ lơh broă Quôk hội dê bơyai lơh. Đơs tàm dơ̆ cribơyai, Củ tịc Quôk hội ồng Vương Đình Huệ đơs nền, dơ̆ pơrjum là broă lơh broă tờm ngan bơh Quôk hội dê.

Tơngai lài, neh geh uă tơngume tàm tơngume pal jăt dơ̆ pơrjum dê geh dan jơnau đơs tă pơgồp bơh Quôk hội dê ai lơh tơrlòng lài nàng kờñ gơdờp bal mờ bơta gơbàn bơh kòp Kovid-19 dê mờ bơta geh ngan. Pơn jăt tai ală broă lơh tam gơl do, ală anih lơh broă Quôk hội dê neh jơh nùs, jal mhar kơlôi sơnơng lơh Jơnau rơcăng cih, bơyai lơh uă dơ̆ Pơrjum, cribơyai, tìp măt tơm bơh bơr, pơyua dan jơnau đơs tă pơgồp bơh uă anih lơh broă, mpồl lơh broă dê nàng kờñ lơh sir gơs jơnau rơcăng cih Tơngume pal jăt dơ̆ pơrjum Quôk hội dê (tam gơl). Jơnau rơcăng cih neh geh Ủy ƀan Kơrnoăt boh lam lùp sền bơh sơnrờp mờ yal mờ Ủy ƀan Thường vụ Quôk hội in dan ai jơnau đơs tă pơgồp dơ̆ sơnrờp tàm pơrjum dơ̆ 11 geh lơh tàm nhai 5 pa do.

Cau mblàng Lơ Mu K’Yến