VOV4.K’ho- Drim ngai 06/09, tàm càr Ninh Bình geh lơh Dơ̆ bơyai lơh Tơngkah kir sơnrai 50 nam Kông ươk bè Sền gàr phan lời wơl niam chài mờ brê bơnơm geh is dunia bal mờ tơngume: “50 nam tus: Phan lời wơl dunia- bơta pràn ai pơđơl pràn is, nùs nhơm bơto tơngkah kòn bơnus mờ tam gơl pa bơceh lơh”. Củ tịc Quôk hội ồng Vương Đình Huệ bal mờ kwang đơng lam bồ Đảng, Dà lơgar, Quôk hội tus bal Dơ̆ bơyai lơh Tơngkah kir sơnrai. Mờ phan kwơ niam chài uă ngan, li la ngan, niam bơnĕ krơi is ngan, Việt Nam neh sac rwah mờ lơh sră nggal 08 phan lời wơl niam chài, brê bơnơm geh is pơnrơ ngan mờ geh UNESCO cih tàm Sră cih mat Phan lời wơl Dunia; bal mờ hơ̆, kờp bơh tŭ kĭ Kông ươk nam 1972 tus tŭ do, Việt Nam neh 05 dơ̆ dờp lơh gơnoar broă lơgar tàm Mpồl duh broă Lơh jăt UNESCO.

Củ tịc Quôk hội ồng Vương Đình Huệ bal mờ Kwang đơng lam bồ Đảng, Dà lơgar, mpồl UNESCO tus bal Dơ̆ bơyai lơh Tơngkah kir sơnrai

Dơ̆ bơyai lơh Tơngkah kir sơnrai 50 nam Kông ươk Sền gàr phan lời wơl niam chài mờ brê bơnơm geh is dunia geh lơh tàm càr Ninh Bình tàm tŭ UNESCO hòi jà ală lơgar tàm mpồl bơyai lơh tơngkah kir sơnrai 50 nam Kông ươk, wèt tus Dơ̆ bơyai lơh tơngkah kir sơnrai jơh gùt plai ù tàm Florence, lơgar Italia tàm nhai 11 nam do. Broă lơh do digơlan geh sơnđờm ai dùl ròt ală broă lơh dunia tơngkah kir sơnrai Kông ươk nam 1972 mơkung lơh tềl 35 nam Kông ươk geh lơh jăt tàm lơgar Việt Nam.

Cau mblàng Lơ Mu K’Yến