Đơs tàm dơ̆ Cribơyai, Củ tịc Quốk hội ồng Vương Đình Huệ jờng rơ, bơta gĭt gơ̆p đah lơgar Việt Nam mờ Iran tŭ do sơlơ bơtàu tơnguh niam bơnĕ tơngŏ bơh 3 bơta: lời ai nùs nhơm mờ bơta sền dờng màng bal mờ gơ̆p; bơtàu tơnguh uă bơta bơh Cíñ trị, cribơyai broă mờ lơgar ndai tus lơh sa, kă bro, niam chài; 2 gah lơh broă bal uă ngan, dong kờl bal mờ gơ̆p tàm ală dơ̆ cribơyai uă lơgar.

Củ tịc Quốk hội sồr, bàr gah pal lơh pràn ală mpồl broă lơh bè tàm pơgơl kă bro, tơm priă jền. Củ tịc Quốk hội pin dờn, ală bơta kal ke tềng đăp mat mờ jơh bal ală bơnàng jă jŏ jòng ai lơh broă bal bơh mpồl lơh sa 2 lơgar dê rơ̆p geh bơsong hời rơ hời dùl bă geh cồng nha, pơgồp bơnah lơh mhar bơta bơtàu tơnguh lơh sa, mpồl bơtiàn, tă pơgồp tàm cồng nha bal bơh jơh bal bàr lơgar dê.