Đơs tàm dơ̆ sơnđờm mut lơh, ồng Nguyễn Tấn Tuân- Củ tịc Ủy ƀan Ñân zân càr Khánh Hòa pà gĭt, rơndăp broă lơh gùng lòt bơh Gùng dờng 27C tus gùng càr 656- tàm tơrbŏ bal mờ càr Lâm Đồng mờ Ninh Thuận lòt gan 2 kơnhoàl Khánh Vĩnh mờ kơnhoàl Khánh Sơn geh sền gĭt là rơndăp broă lơh kwơ màng Dà lơgar, geh bơta ơnàng gùng kấp III tiah kơh bơnơm, bơta jòng pơgap 56,7 kơi sồ. Kờp jơh priă bơcri lơh là 1 rơbô 930 tơmàn đong, tơngai lơh rơndăp broă lơh là bơh nam 2023 tus jơh nam 2027.

Rơndăp broă lơh gùng lòt bơh gùng dờng 27C tus gùng càr 656- tàm tơrbŏ bal mờ càr Lâm Đồng mờ Ninh Thuận là gơl gùng kwơ màng, tàm tơrbŏ bal mờ 2 kơnhoàl tiah kơh bơnơm Khánh Sơn mờ Khánh Vĩnh, lơh geh ală bơta bơtàu tơnguh lơh sa- mpồl bơtiàn 2 kơnhoàl đơs is mờ càr Khánh Hòa đơs bal, tơnguh bơta pràn tàm tơrbŏ gùng lòt, jun pơndiang phan bơna ală kơnhoàl ù tiah mờ càr Lâm Đồng mờ Ninh Thuận; tơnguh broă sền gàr Dà lơgar, lơngăp lơngai tàm tiah do, lơh geh ală gùng lòt ƀuơn ngan, niam ngan tàm tơl ală bơta gơlik geh nàng gàr niam lơngăp lơngai, sền gàr Dà lơgar; drơng broă geh cồng nha broă lơh lòt sền, gròi sền, atbồ mờ sền gàr brê.

Kung tàm ngai 01/03, Củ tịc Quôk hội Vương Đình Huệ bal mờ mpồl lơh broă neh jàu pà 200 nơm hìu bơta nđàc ai ală hìu bơnhă rƀah kơnhoàl Khánh Sơn mờ kơnhoàl Khánh Vĩnh in.