Đơs pơndŭt tàm pơrjum, Củ tịc Quôk hội ồng Vương Đình Huệ đơs nam 2023 ală kwang bàng Quôk hội neh jơh nùs lơh jăt nùs nhơm lơh adăt boh lam rơcăng lài, jăt sền geh cồng nha mờ lơh nền gùng dà broă lơh di tŭ, lơh jăt niam ngan, nùs nhơm geh kơnòl, tàm broă lơh lơh adăt boh lam, lơh nền ală broă kwơmàng bơh dà lơgar dê mờ jăt sền, tìp măt mờ cau tĕ khà, broă wă làng bol, jăt sền, hòi bơtrồt ngan broă bơsong sră pơyua yal yă, lùp lăp bơh làng bol dê.

Tàm tơngai tus, Củ tịc Quôk hội ồng Vương Đình Huệ sồr, ală mpồl Kwang bàng Quôk hội, ală kwang bàng Quôk hội gàr niam ală cồng nha neh lơh geh, pơn jăt tai rề ơnàng, tơnguh tai bơnah broă lơh, tơnguh uă rlau tai cồng nha lơh broă bơh mpồl kwang bàng Quôk hội dê. Kwơmàng pơn jăt tai lơh jăt niam broă lơh mờ gơnoar broă kwơmàng bơh mpồl kwang bàng Quôk hội dê tàm tŭ lam lơh mờ lơh broă bơh Quôk hội lơgar Việt Nam dê đơs bal. Củ tịc Quôk hội tơngkah, mpồl kwang bàng Quôk hội tus bal pơgồp bal mờ Mpồl duh broă Jơi bơtiàn mờ ală Ủy ƀan bơh Quôk hội dê jăt sền tàm ƀòn lơgar; jăt sền, sồr bơtrồt broă bơsong jơnau lùp lăp, yal yă, jơnau sồr, jơnau dan bơh cau tĕ khà dê.