Đơs tàm dơ̆ yal rơndap ù tiah, Phó Thủ tướng Trần Hồng Hà pà git, sră wac sềr rơndap ù tiah càr Phú Yên geh lơh mờ bồ tơngoh kơlôi sơnơng tam gơl pa, broă wèt sền jŏ jòng jat tàm bơta pràn krơi is bè ală bơta pràn phan geh is mờ niam chài. Rơndap ù tiah càr rơp là sră wac sềr tơrgùm jơh ală rơndap ù tiah, geh kuơ ai broă đal git lài ù tiah bơtàu tơnguh tàm bơta lơh bal nền nòn gơ rềng mờ ală càr tiah đah jum tàm gùl lơgar mờ Tây Nguyên.

Nàng lơh gơtùi ală jơnau kờñ do, Phó Thủ tướng Cíñ phủ Trần Hồng Hà sồr càr Phú Yên pal ai ală jơnau bơsram mờng chài bơtàu tơnguh bơh ală càr tàm tiah do dê, pơn jat tai tam gơl pa, bơceh lơh, jòi geh gùng lòt is nàng Phú Yên gơ gơs là tiah pal tus bơcri priă ngan, pal tă pơgồp ngan, dipal ngan nàng lòt sền git. Rơndap ù tiah càr Phú Yên neh git loh làng gùng dà bơtàu tơnguh càr Phú Yên tàm tơngai tus jat tàm 1 bơta tờm; 2 gùng kềng; 3 tơngume tờm; 4 bơnàng jă tam gơl pràn; 5 kơnòl broă lơh tờm mờ jơnau kờñ ai tơlik tus nam 2030, Phú Yên gơ gơs là càr bơtàu tơnguh jat gùng dà tam gơl pa mờ bơtàu tơnguh.

Lơh broă mờ kwang đơng lam bồ càr Phú Yên, Củ tịc Quôk hội Vương Đình Huệ sồr Đảng ƀộ, gơnoar atbồ mờ Làng bol càr Phú Yên pơn jat tai lam lơh jat geh cồng nha ală Nghị quyết bơh Đảng dà lơgar, Quôk hội, Cíñ phủ dê, broă tờm là gơtùi gàr kơ̆ khà gơguh lơh sa, bơsong ală bơta kòl yan nàng lam lơh gơtùi broă geh jàu ai nam 2024 in mờ ai jơh gùt tơngai lơh broă in; càr kung pal pin dờn, jòi bàn ală bơta krơi is nàng bơtàu tơnguh, hơ̆ là bơta krơi is bè phan kuơ geh is, ù tiah, bơta niam chài.

Lài hơ̆, Củ tịc Quôk hội Vương Đình Huệ neh lơh broă mờ Ƀan lơh kơnòl broă sùm Tỉñ ủy càr Khánh Hòa bè cồng nha lam lơh kơnòl broă cíñ trị nam 2023, gùng dà nam 2024 mờ sền sơ wì cồng nha lam lơh jat Nghị quyết sồ 55 bơh Quôk hội dê bè lam lơh tơrlòng lài 2, 3 gùng dà, broă lơh, broă dong kờl krơi is bơtàu tơnguh càr Khánh Hòa mờ tus bal Dơ̆ yal rơndap ù tiah tiah drà pa Cam Lâm, Khánh Hòa.