Tàm nùs nhơm jơh nùs ki ngàm ngan, ala măt Quốk hội, cau tĕ khà mờ Làng bol gùt lơgar, Củ tịc Quốk hội Vương Đình Huệ neh chu nàng thồm tơlik nùs nhơm git ưn ngài uă ngan tus mờ Củ tịc Hồ Chí Minh. Củ tịc Quốk hội yal broă neh lơh geh tềng đăp Wa Hồ, nam 2023, Quốk hội neh lơh gơs khà broă uă ngan.

Dơ̆ sơnrờp bơh tàm 78 nam lơh broă, Quốk hội neh bơyai lơh khà dơ̆ pơrjum uă ngan tàm dùl nam mờ 05 dơ̆ pơrjum, sền wơl, ai tơlik kơrnoăt di tŭ 84 broă dờng, kwơ màng dà lơgar dê, di pal mờ jơnau kờñ jal mhar bơh bơta mùl màl, ai geh bơta nàng lơh pràn broă lơh jăt kơnòl nam 2024 mờ ală nam pơn jăt tai. Tềng đăp huềng soàn Wa Hồ, Củ tịc Quốk hội Vương Đình Huệ mờ Mpồl kwang bàng ala măt hơ geh pơn jăt tai lơh geh cồng nha ală kơnòl broă tàm nùs nhơm pơn jăt tai tam gơl pa, lơh broă bal nền nòn mờ Cíñ phủ, mờ làng bol bal mờ mpồl lơh sa kă bro, lơh pràn broă bơtàu tơnguh mhar, kơl jăp dà lơgar dê, cèng wơl rài kis hờm ram, gơboh gơbài ai ală làng bol in, ai dà lơgar dờng pràn ndrờm bal mờ ală lơgar dờng tàm 5 câu di bè jơnau mờ Wa Hồ kơ̆p kờñ lài mờ tŭ chơ̆t.