Pà phan ai rlau 360 hìu bơnhă cíñ săc, cau geh màng mờ dà lơgar, hìu bơnhă rƀah, cau gơtìp sơnơm khih dioxin lơh aniai, cau lơh phan, cau lơh broă geh rài kis kal ke geh mat tàm Hìu Niam chài càr Bạc Liêu dê, Củ tịc Quôk hội Vương Đình Huệ đơs sùm, Đảng mờ Dà lơgar kung bè Quôk hội, Cíñ phủ tàm jơh ală tŭ lơh nền gùng dà broă lơh bơh he dê sùm pơđơl pràn lơh ngan nàng bơtàu tơnguh lơh sa- mpồl bơtiàn nàng jơnau kờñ dờng ngan rlau jơh là sền gròi trang gàr ai làng bol in.

Tàm tơngai tus, Củ tịc Quôk hội sồr ală kâp ủy Đảng, gơnoar ătbồ, Mặt trận Dà lơgar mờ ală mpồl cau tàm jơh gùt càr kơlôi sơnơng bơsram mờ lam lơh jăt niam Jơnau sồr sồ 26 bơh Ƀan Ƀí thư dê bè lam lơh sa tềp bơhiàn yau dà lơgar dê nam Giáp Thìn 2024, pal sền gàr niam lơngăp lơngai ai làng bol in; sền gròi trang gàr hìu bơnhă cíñ săc, hìu bơnhă geh màng mờ kăc màng, ală cau geh rài kis kal ke geh chờ hờp wă rò sơnam pa sa tềp ram mhŭ mờ niam lơngăp lơngai ngan.

Kung tàm mho ngai 25/01 sơl, Củ tịc Quôk hội Vương Đình Huệ mờ Mpồl lơh broă bơh Dà lơgar dê tìp măt Mpồl Lơh kơnòl broă sùm Tỉñ ủy càr Bạc Liêu. Củ tịc Quôk hội tơngkah càr mhar geh broă rơndăp lơh, broă lơh broă dipal mờ rơndăp ù tiah kơnhoàl ù tiah jăt tàm bơta lơh pràn gơhòi gơ jà bơcri priă, ngui niam ngan rlau jơh bơta pràn, bơta ƀươn bơh tiah he dê, bơtàu tơnguh lơh sa- mpồl bơtiàn mờ sền gàr niam dà lơgar, lơngăp lơngai tiah ring dà dờng Cửu Long tus nam 2030, broă rơndăp lơh tus nam 2045.