Đơs mut pơrjum, Củ tịc Quôk hội pà git, pơrjum dơ̆ do sền sơ wì 5 tơngume, tàm hơ̆ ai jơnau đơs tàm jơnau rơcang cih Adat Prap gàr (tam gơl), rơndap lơh Adat tam gơl, bơ tơl 2, 3 bơta bơh Adat ơm gak mờ sền gàr; sền sơ wì jơnau yal broă lơh bơta kơp kờñ làng bol bơh Quôk hội dê nhai 1 mờ 2, 3 tơngume kuơmàng ndai.

Bè jơnau rơcang cih Adat Prap gàr (tam gơl), ală kwang bàng jờng rơ jơnau rơcang cih adat neh cih dờp, bơsong uă ngan rlau jơh jơnau đơs bơh ală kwang bàng Quôk hội dê tàm pơrjum dơ̆ 6. Củ tịc Quôk hội sồr, bơh tŭ do tus tŭ yal Quôk hội in sền sơ wì, ring bal mờ tus tŭ kĭ ngan ngồn, pal pơn jat tai kờp sền nàng gàr bơta ring bal bơh ală adat boh lam dê, pơn yơu bè ală bơta bè tam gơl sồ, prap gàr sồ, Cíñ phủ sồ, lơh sa sồ, mpồl bơtiàn sồ; tàm pơn dờm mờ Adat Măi mok yal tơnggit jơnau, Adat lơngăp lơngai tàm internet; Adat dờp jơnau tơnggit, Adat sền gàr jơnau ndơp ndơr dà lơgar, Adat phan lời wơl niam chài.