Củ tịc Quôk hội đơs, Ƀộ Y tế neh tơrgùm tă pơgồp jơnau đơs ai Cíñ phủ in dan Quôk hội ai lơh jăt Adat Kham kòp, sơm kòp (tam gơl). Do là tềl kah, broă lơh gơcèng bơta lơh nền tus bơta bơtàu tơnguh bơh gah lơh sơnơm dê, lơh geh tơngume adat boh lam ƀươn ƀoài, loh làng ai ală anih kham sơm kòp in. Bơta do đơs nền bơta lơh ngan bơh jơh bal Quôk hội mờ Cíñ phủ dê tàm ală tŭ lơh, lơh sir mờ ai lơh jăt Adat.

Tơngai tus, Củ tịc Quôk hội Vương Đình Huệ, sồr: Gah lơh sơnơm pơn jăt tai bơsram, kơlôi sơnơng mờ lơh jăt wil tơl bè gơnoar broă, jơnau gơtha bơh gah lơh sơnơm dê, jơnau nting tơngkah bơh Wa Hồ dê, jơnau cih tàm ală Kơrnoăt bơh Đảng dê bè gah lơh sơnơm. Kơrnoăt sồ 20 đơs nền, bơ̆t bơtàu rài lơh sơnơm lơgar Việt Nam dê jak chài, jơi bơtiàn, drơng làng bol in, bal mờ jơnau kờñ dờng màng ngan rlau jơh là tơnguh jơnhoa pràn kơldang să jan jơh bal bè să bồ, nùs nhơm mờ bơta niam rài kis làng bol dê.