Đơs tàm do, Củ tịc Quôk hội Vương Đình Huệ jờng rơ ngan: Sền swì kờp dŭ priă jền Dà lơgar neh lơh jăt niam gơnoar broă, kơnòl broă geh jàu jăt jơnau cih bơh sơnoa boh lam dê mờ jơnau cih bơh adat boh lam dê. Jăt sền, drơng lơh jak ngan ală gơnoar broă, kơnòl broă bơh Quôk hội dê, mờ kwơmàng là broă lơh jăt sền ală tơngume mìng dồ lơm dờng ngan rlau jơh bơh Quôk hội dê.

Nam 2024, kơnòl broă gơ ai tơlik ai ală kâp, ală gah in là kơn jơ̆ kơn jŭt ngan, den tàng bè hơ̆ Củ tịc Quôk hội sồr Mpồl đơng lam Đảng ủy mờ jơh ală kwang bàng đơng lam bồ gah sền swì kờp dŭ priă jền pơn jăt tai lơh tơngkah wơl tàm jơh gùt gah lơh broă do, nùs nhơm tàm pơrlòng lơh geh cồng nha geh kwơ ngan rlau jơh tơngkah kir sơnrai 30 nam ngai tơlik mat gah sền swì kờp dŭ priă jền dê. Sền swì kờp dŭ priă jền Dà lơgar jăt broă lơh broă bơh Quôk hội dê, Ủy ƀan Thường vụ Quôk hội dê nàng drơng broă ngai sơlơ jak ngan ai Quôk hội in tàm broă lơh adat boh lam, jăt sền dờng ngan rlau jơh mờ lơh nền ală broă kwơmàng dà lơgar dê. Kwơmàng tàm broă lơh adat boh lam nàng kờñ gŏ ală bơta ờ hềt dipal, ờ pràn jak, tàm rơndăp tàm rơndồl tàm ală tŭ lơh jăt kơnòl broă.