Đơs tàm dơ̆ tìp mat, Củ tịc Quôk hội sồr Kwang atbồ ală Anih lơh broă ala mat lơgar Việt Nam tàm lơgar ndai pal sơlơ tơnguh rlau tai bơta gĭt gơ̆p đah Quôk hội lơgar he mờ anih lơh broă lơh adat boh lam dà lơgar he ơm kis nàng lơh bơta gĭt gơ̆p niam bơnĕ mờ ală Nghị sỹ bơh lơgar he ơm kis.

Tàm dơ̆ wă, Củ tịc Quôk hội ồng Vương Đình Huệ đơs nền, cribơyai broă mờ lơgar ndai tă pơgồp uă ngan nàng dà lơgar geh phan bơna, gơnoar, bơngă pin dờn mờ gơnoar broă tàm anih lơh broă tàm dunia bè tŭ do. Sơlơ̆u wơl, gơnoar broă, gơnoar, bơngă pin dờn bơh dà lơgar dê tŭ do kung lơh geh ală bơta jơh bal bè bơta ƀuơn mờ bơta pràn, lơh geh tiah ƀuơn ƀoài ai broă lơh cribơyai broă mờ lơgar ndai. Bơta kwơ màng bơh cribơyai broă mờ lơgar ndai bơh ală lơgar dê mờ ngan là lơgar Việt Nam bol he dê hơ̆ là bơta pràn tơrgùm bal. Củ tịc Quôk hội sồr, Kwang atbồ ală Anih lơh broă ala mat lơgar Việt Nam tàm lơgar ndai pơgồp bơnah uă ngan tàm broă sền gàr kơ̆ kơljap lơngap lơngai is, gơnoar tờm, tơrgùm dùl, tơl làm kơnhoàl ù tiah bơh Dà lơgar dê, sền gàr lơngap lơngai Dà lơgar “bơh gờñ, bơh ngài” sền gàr bơta lơngap lơngai mờ chờ hờp bơh làng bol dê. Do là kơnòl broă sùm, jŏ jòng, kwơ màng pal sùm cih kah mờ lơh jat dùl bă  jơh nùs, jŏ jòng.