Tàm dơ̆ còp mờ lơh broă mờ Kông ty Kau su Tân Biên, Củ tịc Quôk hội ồng Vương Đình Huệ tơlik nùs nhơm chờ hờp tŭ lòt gan ală sươn kau su tơlir niam ngan, dờng ơning ơnàng ngan. Bơta tơlir niam hơ̆ là cơng tàng tơngŏ ngan ngồn ai bơta gĭt gơ̆p đah 2 lơgar Việt Nam mờ Campuchia in. Củ tịc Quôk hội ồng Vương Đình Huệ đơs sùm, ală cồng nha niam bơnĕ neh lơh geh bơdìh mờ bơta lơh ngan bơh Mpồl kwang bàng đơng lam bồ dê mờ jơh ală kwang bàng, kông ñân, cau lơh broă tàm Kông ty dê gam pal đơs tus bơta kờñ bal, dùl nùs bal, dong kờl bal, lơh broă bal, ai tơl ală bơta bơh Cíñ phủ lơgar Campuchia dê tai, mờ să tờm tơn là gơnoar ătbồ càr Kampong Thom. Di tàm dơ̆ do, Củ tịc Quôk hội jờng rơ ngan mờ jơh nùs ưn ngài gơnoar ătbồ càr, ală sở, ngàñ bơh càr, kơnhoàl dê neh dong kờl, ai tơl ală bơta ƀươn ai broă lơh bơh kông ty dê in.