VOV4.K’ho- Mho mang ngai 23/08, tàm Hìu Quôk hội, Củ tịc Quôk hội ồng Vương Đình Huệ neh wă rò Mpồl cau ala măt Ƀan Ơruh pơnu Đảng Làng bol lơh tờm Khăt gơboh is (LDP) lơgar Nhờk dê lòt còp mờ lơh broă tàm lơgar Việt Nam. Củ tịc Quôk hội ồng Vương Đình Huệ gờm chờ Đảng LDP lơgar Nhờk dê ai geh bơta jai pha dờng ngan tàm dơ̆ tĕ khà Thượng viện nhai 07 pa do. Jờng rơ ngan gơnoar broă bơh ơruh pơnu dê, ală nghị sĩ kơnòm să tàm broă bơtàu tơnguh bơta gĭt gơ̆p đah Việt Nam mờ Nhờk, Củ tịc Quôk hội ồng Vương Đình Huệ đơs nền, Quôk hội Việt Nam kờñ bal broă tơnguh tai bơta gĭt gơ̆p đah rơnàng kơnòm să bàr lơgar mờ ală nghị sĩ kơnòm să bàr lơgar dê.

Củ tịc Quôk hội sồr ală nghị sĩ kơnòm să Ƀan Ơruh pơnu Đảng LDP lơgar Nhờk dê pơn jăt tai sền gròi tus mpồl bơtiàn cau Việt Nam tàm lơgar Nhờk, sền gròi rlau tus ală gùng dà broă lơh lơh broă bal bè cau lơh broă đah bàr lơgar, ai tơl ală bơta nàng cau lơh broă lơgar Việt Nam in lòt lơh broă tàm lơgar Nhờk. Bal mờ hơ̆, ơruh pơnu bàr lơgar gơtùi bơyai lơh ală Festival ơruh pơnu, cau bơsram dờng ờs mờng jăt tơngai, ngan là tàm nam 2023 tus tŭ bàr lơgar tơngkah kir sơnrai 50 nam lơh bơta gĭt gơ̆p cribơyai broă mờ lơgar ndai; nghị sĩ kơnòm să bàr lơgar pal sơlơ tơnguh tai ală dơ̆ lòt còp, tàm yal tơngĭt bal bơta mờnh chài lơh broă, cribơyai bè ală broă sền gròi bal.

Cau mblàng Lơ Mu K’Yến