VOV4.K’ho- Wă Mpồl Ủy ƀan Kă bro dunia bơh Nghị viện câu Âu dê bơh ồng Bernd Lange lam bồ lòt còp mờ lơh broă tàm Việt Nam, Củ tịc Quôk hội Việt Nam ồng Vương Đình Huệ đơs sùm, Quôk hội mờ ală anih lơh broă geh gơnoar bơh Việt Nam dê tŭ lơi kung rơcăng lơh broă bal mờ Mpồl tam klăc câu Âu nàng hòi jà ală lơgar ndai bơh Mpồl tam klăc câu Âu (EU) dê kĭ mờ lam lơh jăt Hiệp địñ Kă bro khăt gơboh đah Việt Nam mờ EU (EVFTA).

Củ tịc Quôk hội Việt Nam ồng Vương Đình Huệ đơs là, dơ̆ lòt còp bơh Ủy ƀan Kă bro dunia bơh Nghị viện câu Âu dê geh lơh tàm tơngai Việt Nam mờ EU geh bơta gĭt gơ̆p ngan ngồn tàm jơh ală broă tờm: cíñ trị, cribơyai broă mờ lơgar ndai, lơngăp lơngai, sền gàr dà lơgar, lơh sa mờ ală gah broă lơh ndai. Củ tịc Quôk hội Việt Nam sồr EU pơn jăt tai gàr gơnoar gàr niam bơta ring lơngai, kơ̆ kơl jăp, lơngăp lơngai mờ ờdo ờdă gùng dà lềng mờ gùng rơndeh par tàm dà lềng đah măt tơngai lik; lơh jrô ơnàng rlau tai ală bơta gĭt gơ̆p bơh Việt Nam dê mờ EU bal mờ ală lơgar gam wơl tàm mpồl tàm ală dơ̆ pơrjum uă gah; pơn jăt tai tơnguh lơh broă bal đah EU mờ Asean, ngan là tơnguh gơnoar broă Asean dê tàm Ấn Độ Dương- Thái Bình Dương.

   Cau mblàng Lơ Mu K’Yến