VOV4.K’ho- Mho mang ngai 20/01, tàm Hìu Quôk hội, Củ tịc Quôk hội ồng Vương Đình Huệ wă rò mò Márta Mátrai, Phó Kwang ătbồ dơ̆ dùl Quôk hội lơgar Hungary gam còp mờ lơh broă tàm Việt Nam.

Củ tịc Quôk hội ồng Vương Đình Huệ gờm chờ mò Phó Kwang ătbồ dơ̆ dùl Quôk hội mờ Mpồl kwang bàng lòt còp mờ lơh broă tàm Việt Nam tàm ală ngai bồ sơnam pa tơn mờ đơs sùm, Quôk hội Việt Nam geh sền gròi, lam lơh jăt mờ jăt sền broă lơh Hungary neh tă 500 tơlak euro priă ODA ai bàr pe rơndăp broă lơh gơwèt ală gah broă lơh ai lơh lài lơh broă bal đah 2 lơgar kung bè 200 bơnah priă dong kờl bơsram pah nam ai cau bơsram dờng Việt Nam in gam bơsram gah lơh sa, măy mok kwơmàng in; mơkung kờñ bal broă geh anih tờm niam chài Hungary tàm Việt Nam, gơn kơnờm do geh gơ gơs là anih gơhòi gơ jà uă cau bơsram dờng lài do neh geh tŭ bơsram tàm lơgar Hungary mờ làng bol Việt Nam. Củ tịc Quôk hội ồng Vương Đình Huệ sồr, tàm tơngai tus, bàr gah geh kĭ wơl jơnau ring bal lơh broă bal đah bàr Quôk hội dùl bă wil tơl mờ tơl làm rlau.

Cau mblàng Lơ Mu K’Yến