Drim ngai 21/8, Củ tịc Thượng viện lơgar Bỉ mò Stéphanie D’Hose bal mờ Mpồl kwang ala mat lơgar Bỉ neh tus ƀlàng rơndeh par Nội Bài, ƀòn dờng Hà Nội, sơn đờm còp ngan ngồn lơgar Việt Nam bơh ngai 21 tus ngai 25/8/2023 jat jơnau jà bơh Củ tịc Quôk hội ồng Vương Đình Huệ dê. Việt Nam mờ Bỉ lơh bơta git gơp cribơyai broă mờ lơgar ndai tàm nam 1973. Kờp bơh tŭ lơh bơta git gơp cribơyai broă mờ lơgar ndai, git gơp lơh bơyô ờs mờng mờ lơh broă bal niam bơnĕ đah 2 lơgar gam pơn jat tai bơtàu tơnguh niam ngan. Củ tịc Thượng viện lơgar Bỉ mò Stéphanie D’Hose là kwang bàng cíñ trị kâp dờng ngan rlau jơh bơh lơgar Bỉ dê lòt còp lơgar Việt Nam tàm nam 2023 do. Do kung là tŭ 2 lơgar tơngkah kir sơnrai 50 nam Ngai lơh bơta git gơp cribơyai broă mờ lơgar ndai (22/3/1973- 22/3/2023) mờ 5 nam lơh broă bal jŏ jòng tàm gah lơh sa suơn sre.

Dơ̆ lòt còp ai tơnggŏ bơta sền dờng màng bơh kwang đơng lam bồ lơgar Bỉ dê tàm bơta git gơp mờ Việt Nam mờ tàm pơn jat tai dơ̆ lòt còp bơh Củ tịc Quôk hội ồng Vương Đình Huệ dê tàm nhai 9 nam 2021. Dơ̆ lòt còp nàng kờñ sơlơ tơnguh lơh broă bal lơh sa, kă bro mờ bơcri priă kung bè lơh broă bal đah Quôk hội Việt Nam mờ Nghị viện Bỉ, sơlơ tơnguh rlau tai bơta tàm pơgồp bal đah 2 lơgar tàm ală dơ̆ cribơyai uă gah bè Liên hợp quôk, ală mpồl lơh broă ală liên viện tàm tiah do mờ dunia.