Mơya neh 5 nhai do, kơnhoàl kung gam kơ̆p càr sền geh ai ơm ing lah ờ. Tàm tŭ hơ̆, tềng gơl dà dờng do geh ală ơhò, plung gam ngai kung bè mang jồp bràs tàm nùs nhơm ờ sŭk ngan bơh làng bol tŭ ù lơh sa rơhời gơtìp tơrlah jơh.

Drim ngai 04 nhai 03 mờ mho ngai 08 nhai 03, bol añ geh tus tàm tiah lơh bràs tàm dà dờng Krông Nô, gơl lòt gan xã Quảng Phú, kơnhoàl Krông Nô, càr Dăk Nông. Tềng gơl dà dờng mìng jòng rơlao 2 kơi sồ, neh geh 6 nơm ơhò jồp bràs pờ măi ntas lơngăñ ngan. Geh ờ uă ơhò gam jồp bràs tàm dà dờng, bràs sùm geh jồp tuh tàm ơhò. Tàm tiah geh UɃÑZ càr Dăk Nông ai ală mpồl lơh sa kă bro in lơh bràs, uă tiah gam gơtìp tơrlah jrô tàm ù gờl, lơh dà dờng gơtìp tam gơl, mơya ơhò kung gam jồp bràs sùm. Dùl nă làng bol kis tàm ƀòn Phú Lợi, xã Quảng Phú ờ sŭk ngan pà git, broă lơh bràs tàm ală nam pa do neh lơh ù tiah gơtìp tơrlah ngai sơlơ uă, lơh roh uă ngan ù lơh sa: “Đơs bal tàm do den rơ̆p 5 jơ àng drim là cau neh jồp bràs bloh, cau jồp bràs tus bơh 6 tus 7 jơ mang tơn hơ̆ sồng ơm. Tŭ gŏ he den cau jồp pleh hờ bơdìh, gam di lah ờ gŏ he den cau ai tơn ding jồp rềp tơn tềng gah dà, lơh tơrlah ù tơn. Hơ̆, bè bi neh gŏ hờ đah ne, tŭ do geh lời ding mŭt tơn tàm hơ̆, tàm 2 ngai mơ là ù jăt gah hơ̆ geh tơrlah jơh. Gơnoar atbồ pal jòi tơl bơta nàng lơh bè lơi, di lah ờ broă lơh bràs geh lời lơh sùm bè do den ù lơh sa gơtìp tơrlah jơh”.

Ồng Nguyễn Chung Huy, Kwang atbồ phòng Tài nguyên mờ Môi trường kơnhoàl Krông Nô, càr Dăk Nông pà git, broă gơtìp tơrlah jăt gah dà dờng Krông Nô gơwèt xã Quảng Phú ngai sơlơ uă tàm ală tiah mpồl lơh sa kă bro geh ai sră lơh bràs. Jăt jơnau kờp lồi nam 2022, geh 28 hìu tàm xã Quảng Phú gơtìp hoàc huơr bè ù lơh sa, phan tam tài tơrlah ù tềng ală gơl dà dờng geh ai 3 mpồl lơh sa kă bro lơh bràs. Ală hìu làng bol neh lơh sră pơyoa tus UɃÑZ xã Quảng Phú mờ tŭ do gơnoar atbồ xã gam lơh kòn gùng nàng ai mpồl lơh sa kă bro in ring bal tơm ntrờn ală hìu làng bol do in. Ồng Nguyễn Chung Huy đơs là, broă lơh bràs tŭ do gơtìp kal ke ngan, bơta gơtìp tơrlah ù lơh tus mờ broă yal yă, yal khài gơtìp kal ke ngan. Ồng Huy kung đơs tờm, ală gơl dà dờng geh UɃÑZ càr Dăk Nông ai sră lơh bràs ală mpồl lơh sa kă bro in lơh tàm tŭ lài ờ gơtìp tơrlah ù. Jăt mờ kơrnoăt geh ai lơh, mpồl lơh sa kă bro geh lơh ngài mờ tiah jăt gah dà dờng 20 thơ̆k, mơya kal ke tàm bơta là ờ geh ai loh làng ngài 20 thơ̆k mờ ù gờl lài ngan tŭ geh ai sră lơh ha là tàm ală tŭ. Lơh gơtìp bơta tơrlah ngai sơlơ geh uă den ală ơhò jồp bràs sơlơ mŭt jrô rơlao tềng gah dà dờng lài do. Tŭ do, geh ờ uă tiah neh tơrlah git nđờ jơ̆t thơ̆k, ơhò, plung di gơlan geh lơh jrô tềng gah dà dờng lài do. Mờ do là broă adăt boh lam geh ai tơlik nàng ală sở, gah lơh broă bal mờ UɃÑZ càr Dăk Nông in sền sơwì nàng geh lơh niam wơl: “Tiah geh ai lơh tàm tiah sơnrờp, tiah lồi dŭt, bơdìh hơ̆ tai jăt broă rơndăp lơh geh ai ngài mờ ù gờl 20 thơ̆k. Rơndăp broă ai lơh là bè hơ̆, gam geh ù tiah jăt gah tai là dùl bơta krơi is, jăt mờ tơl tŭ, gam gơtìp kal ke tàm do. Kơnhoàl kung neh uă dơ̆ geh jơnau dan lơh bè lơi, jăt jơnau đơs là ù jăt gah tàm tŭ geh sền geh ai lơh, ờ gŏ di tŭ neh tơrlah hơ̆ sồng ai geh cơng tàng ù jăt gah tàm tiah lơi là dùl broă lơh adăt boh lam dê”.

Mờ bơta gơtìp tơrlah ù neh uă ngan, nhai 11 nam 2022, UɃÑZ kơnhoàl Krông Nô neh geh sră nggal dan mờ UɃÑZ càr Dăk Nông ơm ing broă lơh bràs tàm ală tiah gơtìp tơrlah ù tàm xã Quảng Phú. Mơya, kơnhoàl gam kơ̆p càr sùm bơh tŭ hơ̆ tus tŭ do, tŭ bơta tơrlah gơlik geh sùm pah ngai: “Gơwèt mờ bơta tơrlah jăt gah dà dờng Krông Nô den kơnhoàl kung neh geh ờ uă jơnau dan, hòi jà ală mpồl lơh bràs mhar lơh mờ lơh gơs gùng dà broă lơh niam wơl, lơh niam wơl tiah kis tàm broă lơh bràs nàng pơyoa ală anih lơh broă geh gơnoar in sền, ai git mờ lơh jăt bal. Dan sở Tài nguyên mờ Môi trường in sền, sền gròi nàng git wơl bơta gơtìp tơrlah jăt gah dà dờng. Dan ơm ing lơh bràs di jăt mờ kơrnoăt tàm Nghị định sồ 23 bơh Cíñ phủ. Sơnđan ing là ờ ai lơh nàng lơh niam wơl tiah kis, tơnơ̆ mờ tŭ neh lơh niam wơl den hơ̆ sồng geh lơh wơl. Kơnhoàl dan hơ̆ sồng gam gơnoar bơh càr sền bè lơi tai, tus tàm bơta lơi mơ”.

Tàm dà dờng Krông Nô, ù tiah xã Quảng Phú, kơnhoàl Krông Nô, UɃÑZ càr Dăk Nông ai 4 pang sră lơh bràs ai 4 mpồl lơh sa kă bro in, tàm hơ̆ geh: Kông ty TNHH MTV lơh phan geh is Phước Lộc, Mpồl lơh sa kă bro cau dùl nă să lơh is Văn Hồng, Kông ty TNHH MTV lơh phan geh is Quảng Phú mờ Kông Ty TNHH MTV Hải Khánh Ngân. Tàm hơ̆, Kông ty TNHH MTV Hải Khánh Ngân neh ơm ờ lơh broă bơh nhai 1 nam 2022. 3 mpồl lơh sa kă bro gam tai gam lơh broă mờ kờp jơh bơta pràn 68 rơbô khối tàm 1 nam tàm bơta jòng gơl dà dờng geh lơh 6 kơi sồ 400 thơ̆k.

Mờ broă gơtìp tơrlah geh ngai sơlơ uă tàm xã Quảng Phú, broă ơm ing lơh bràs nàng lơh jăt ală broă sền gàr tiah jăt gah dà dờng, lơh niam wơl tiah kis di jăt mờ Nghị định sồ 23 bơh Cíñ phủ mờ jăt jơnau dan bơh kơnhoàl Krông Nô là di pal ngan. UɃÑZ càr Dăk Nông pal gờñ geh kơrnoăt, pleh mờ broă tơrlah gam gơtìp sùm, lơh aniai dà dờng Krông Nô kung bè lơh roh ù lơh sa làng bol dê.