VOV4.K’ho- Tàm ală ngai ơm rlô dơ̆ bơyai lơh Duh kah bơtau Hùng, uă ngan năc lòt nhơl neh tus Dà Làc, càr Lâm Đồng. Tàm Hìu duh kah Âu Lạc gơ ơm tàm tiah nhơl chờ tiơng pơnrơ kâp dà lơgar Tiah nhơl chờ Ñrùh dà Prenn neh bơyai lơh dơ̆ lơh chờ duh kah Bơtau Hùng, gơhòi gơ jà uă ngan năc lòt nhơl mờ làng bol tàm tiah do tus sền.

Dơ̆ lơh chờ gơhòi gơ jà uă ngan năc lòt nhơl tus mờ ƀòn dờng Dà Làc

Mờ tơngume “Ndu tàm nggu rơyas”, dơ̆ lơh chờ duh kah Bơtau Hùng geh lơh ki ngàm ngan, mờ 3 bơnah lơh yàng tờm: Mpồl lòt rò phan ơn pơdơng duh khuai Bơtau sơnrờp dà lơgar dê, Dơ̆ lơh yàng ơn pơdơng phan duh khuai ờs mờng bơh yau mờ chu ñàng Bơtau sơnrờp dà lơgar in tàm ală hìu duh khuai đah tô, nggùl mờ đah đơm. Bơdìh mờ dơ̆ lơh yàng, tàm dơ̆ lơh chờ duh kah bơtau Hùng nam do, càr Lâm Đồng gam lơh ală broă lơh đơs crih tam ya, ală jơnau nhơl ờs mờng bơh yau, jơnau nhơl gơ cèng nùs nhơm mpồl bơtiàn, bè: hàu jrong tơngi, tam ya sạp, pờng glah, kờ tướng, drà phan pà ƀòn lơgar...nàng kờñ lơh tơngŏ wơl ală bơhiàn niam chài bơh rài yau bơh gĭt nđờ rài do bơh làng bol Việt Nam dê.

Cau mblàng Lơ Mu K’Yến