VOV4.K’ho- Tơnơ̆ tŭ tơngai jŏ jòng ơm ing tài gơ rềng bơh kòp Kovid-19, broă lơh nhơl chờ bơh ƀòn dờng Dà Làc, càr Lâm Đồng dê neh duh hồl wơl mờ gơ hòi gơ jà ngai sơlơ gal nac nhơl chờ tus. Bulah bè hơ̆, uă bơta ờ niam neh gơlik geh, ngan là bơta “lơh kòn gùng broă drơng ala” lơh broă tràl sơbil ngan, lơh ờ niam tus bơta lơngăp lơngai. Nàng drơng niam jơnau kờñ lòt sền ơm rlô să, ală anih lơh broă geh gơnoar ƀòn dờng gam lơh ngan bơsong ală bơta ờ niam, bơt bơtàu rùp hin Dà Làc lơ bơn niam, git jơnau, kờñ nac.

Tơngai lài, tŭ nhơl chờ Dà Làc duh hồl wơl tơnơ̆ tŭ tơngai ơm ing tài gơ rềng bơh kòp Kovid-19, ƀòn dờng bơkàu do neh gơlik geh dùl ròt ală bơta ờ niam. Pơn rơ ngan rlau jơh là bơta “lơh kòn gùng broă drơng ala” lơh broă tràl sơbil ngan, cau tac phan sơ gràm tiah gah gùng lời ai cau lòt jơng in, tac bro phan ờ niam... Đal git nhơl chờ là gah lơh sa tờm, gơnoar atbồ ƀòn dờng Dà Làc neh lơh ngan tam gơl ù tiah ơm kis tiah drà, sơlơ tơnguh broă lơh atbồ nàng di tŭ bơsong ală bơta ờ niam. Thiếu tá Trương Quang Vũ, mpồl kảñ sát lùp khàu cau tìs bè lơh sa, Kwang àng ƀòn dờng Dà Làc pà git, ală broă “lơh kòn gùng” tam pìt nac gơlik geh tàm tơngai pa do neh geh mpồl kảñ sát lùp khàu cau tìs bè lơh sa lùp khàu mờ bơsong jơh: “Ală mpồl lơh broă geh gơnoar sùm lòt sền, sồr ală anih hơ pơrgon là ờ tă bơnah rhiang pà ală cau pơlam nhơl chờ in, tài bơta do lơh gơlik bơta ờ ring bal đah ală cau lơh kòn gùng, cau pơlam nhơl chờ, lơh gơ rềng ờ niam, lơh ờ niam tus lơngăp lơngai”.

Jat ồng Nguyễn Viết Vân, Kwang atbồ Sở Văn hóa, Thể thao mờ Zu lịc càr Lâm Đồng pà git, bal mờ tơrgùm tơnguh bơta niam, bơtàu tơnguh ală phan bơna nhơl chờ kơ̆ kơljap cèng bơta krơi is, càr gam hòi jà jơh gùt làng bol tơnguh jơnau git wă geh kơnòl tàm broă sền gàr ù tiah ơm kis, bal mờ broă sền gàr mờ gàr niam mờng kwèng cau Dà Làc dê “lơ bơn niam, jak chài, kờñ nac”: “Tơngai tus, bol hi pơn jat tai lơh niam broă lơh mblàng yal, sơlơ tơnguh broă lơh sền sơ wì bơta tơnguh khà priă, lơh kòn gùng den geh lơh glài kràñ. Lơh bè lơi nàng bơt bơtàu rùp hin bơh cau Dà Làc, Lâm Đồng dê niam rlau, gơguh jak, lơ bơn niam, jak chài, kờñ nac; nàng nac nhơl chờ tàm lơgar mờ dunia tŭ tus mờ Dà Làc, tŭ tus mờ Lâm Đồng geh gơ lơh niam rlau, gàr wơl ală rùp hin niam rlau”.

Dà Làc là anih tus lơh gơ kờñ ngan nac nhơl chờ

8 nhai bồ nam do, Dà Làc – Lâm Đồng neh wă 5 tơlak 70 rbô dơ̆ nac nhơl chờ tus sền, ơm rlô să, gơguh 153% pơndrờm mờ bal dùl tŭ nam lài. Jat bi Đào Thị Huyền Trang, nac nhơl chờ bơh càr Bình Thuận đơs, Dà Làc neh tam gơl uă ngan, ờ mìng bơta niam ală broă drơng ala geh tơnguh, phan bơna nhơl chờ uă rlau mờ ală bơta bè lơh kòn gùng, tơnguh khà priă, tac bro jat bơta rồn bơklơn neh gơmù: “Añ gŏ trồ tiah mrềt niam ngan, ù tiah sền niam ngan. Ù tiah tàm do den geh uă anih nàng he in cùp hin. Tơl nă cau kung rềp mềr mờ niam ngan”.

Lơ bơn niam, song ring, git jơnau, kờñ nac geh sền là niam chài bơh cau Dà Làc. Mờ bơta niam chài hơ̆, cau Dà Làc geh tam klac bal nàng kơryan bơta lơh kòn gùng nàng kờñ gơ hòi gơ jà nac nhơl chờ mờ ƀòn dờng bềng bơkàu lơm.

Cau mblàng K’Duẩn