VOV4.K’ho - Mờr 2 poh tai tus satềp Ñâm Zần nam 2022, gah nhơl chờ càr Lâm Đồng gam rơcang ală bơta phan bơna, cau lơh broă nàng drơng niam ngan ală broă kờñ bơh cau năc nhơl chờ in.

Tus mờ suơn Ánh Sáng Dà Làc-do là tiah nhơl chờ geh sền là tiah niam kis ờ ngan bơh ơruh pơnu tàm ală ngai do dê, ală broă lơh geh pơgồp bal bơh măt tơngai sòl, săp đơs crih bal mờ àng gơcrà ồs đèng cèng geh uă tơngu me krơi is neh geh tiah nhơl chờ do rơcang lơh gơs lài, ală broă lơh ndrờm neh geh rơcang nàng drơng broă kờñ nhơl chờ, nhơl sền bơh cau năc dê.

                                 Dùl gah suơn Ánh Sáng Dà Làc neh rơcang nàng wă năc

Ồng Phan Minh Trường, Kwang atbồ đơng lam tiah nhơl sền Suơn Ánh Sáng Dà Làc pà git, bơdìh mờ broă tơnguh uă bơta niam ală phan drơng cau năc in, broă rơcang sơndră mờ kòp Kovid-19 kung neh geh tiah lơh broă do sền kuơ lơh jăt di mờ kơrnoăt geh ai bal. “Bol añ rơcang tơl ală phan nàng rơcang sơndră mờ kòp gơtờp ai cau lơh broă in, bơh tàm chèo tus mờ krơh sơndră mờ ntờc dà par, sơnprồm tê. Cau năc tus mờ Suơn Ánh Sáng den ndrờm geh was bơta duh să jan, sồr pal rào tê lài mờ tŭ mŭt nhơl sền. Bol añ neh rơcang tơl ală bơta, tàm hơ̆ geh bal gùng dà rơcang sơndră mờ kòp gơtờp, ờ mìng geh tàm tiah lơh broă do mờ gam dan cih măt mờ Hìu sơnơm sơnah ƀòn 8 mờ Sở Y tế càr Lâm Đồng tai”.

Ờ mìng ală tiah nhơl chờ pa, mờ ală tiah niam bal mờ tiah tus neh geh pơnrơ ngan tàm ƀòn dờng Dà Làc dê bè: Thiền viện Trúc Lâm, Thung lũng Tình yêu, Ñrùh Prenn, Ñrùh Datanla, Dòr mộng mơ, Suơn bơkào ƀòn dờng mờ ờ uă tiah nhơl chờ tam phan... kung neh rơcang niam ală bơta phan bơna, cau lơh broă, broă lơh drơng ala cau năc nhơl chờ in.

Broă pờ ơnàng ală gơl gùng lòt nàng tơmù kòl rơbndeh tàm tiah tàm gùl kung neh geh UɃÑZ ƀòn dờng Dà Làc lơh gơs

Jăt ồng Nguyễn Viết Vân, Kwang atbồ Sở Văn hoá, Thể thao mờ Du lịc càr Lâm Đồng yal, tus tŭ do, bơh ală hìu ơm tus mờ hìu sa, tiah nhơl chờ tàm ƀòn drờng ndrờm neh geh rơcang tơl nàng drơng cau năc in. tàm hơ̆, bơta niam ờ do ờ dă, gàr niam broă rơcang sơndră mờ kòp Kovid-19 gơtờp kung geh sền gròi. Bal mờ hơ̆, gah nhơl chờ neh pơgồp bal mờ ală mpồl lơh broă geh gơnoar tàm càr tơnguh broă sền gròi, bơto bơto sồr di tŭ ală anih lơh broă drơng ala nhơl chờ lơh niam mơ ală broă lơh gam ờ niam, ờ di di lah geh, di pal niam ală broă kờñ nhơl chờ nam pa, ơm rơlô să bơh cau năc tus mờ Dà Làc – Lâm Đồng tàm satềp tus do in. “Jơh ală phan bơna ndrờm neh bơyai lơh bơsram tàp, ai geh ală tơngu me gơrềng bal bè broă rơcang sơndră mờ kòp gơtờp di jăt mờ kơrnoăt bơh gah lơh sơnơm. Bal mờ hơ̆, ală hìu ơm ndrờm neh geh lơh tơnguh niam, ală tiah nhơl chờ neh geh bơcri priă, ală phan pa ndrờm neh lơh gơs, tàm hơ̆ uă ngan là ală broă lơh drơng ala pa rơlao, hòi jà broă sền gròi uă rơlao bơh cau năc tŭ tus mờ Dà Làc – Lâm Đồng. Kung neh geh pơgồp bal mờ ală mpồl lơh broă gơrềng bal mờ ƀòn dờng Dà Làc nàng rơcang ală bơta bè phan bơna, ờ do ờ dă tàm gùng lòt mờ lơh jăt broă sền gròi, bơto sồr nàng ală mpồl lơh broă drơng cau năc chờ nam pa ờ do ờ dă”.

Cau cih Quang Sáng-Cau mblàng Ndong Brawl