VOV4.K’ho- Ngai 05/7, Ủy ƀan Ñân zân ƀòn dờng Dà Làc, càr Lâm Đồng pà git, ƀòn dờng neh crơng gơs Mpồl kờp sền bơta geh ngan brê mờ broă ngui măi mok pa nàng sơlơ tơnguh rlau tai broă atbồ, sền gàr brê, rơcang sơndră bơta mus kơl brê, sơ gràm ù gam gơlik geh kal ke ngan tàm càr.

Mpồl lơh broă kuơmàng do geh 7 nă kwang geh jơng, bơh Phó kwang atbồ Hạt kiểm lâm ƀòn dờng lơh kwang atbồ mpồl, ală cau gam wơl là cau lơh broă, kwang bàng kỹ thuật bơh ală mpồl tờm brê mờ kiểm lâm làm bă tiah dê. Kơnòl bơh mpồl lơh broă dê là ngui ală măi mok pa bè flycam, ală rùp hin vệ tiñ Google, rùp hin ù tiah.. nàng kờp sền bơta geh ngan brê, drơng broă lơh sền gàr mờ bơtàu tơnguh brê, git gŏ gờñ ală broă lơh tìs, ală anih geh bơta tam gơl bè brê mờ ù tam sền gàr brê. Broă crơng gơs mpồl kờp sền bơta geh ngan brê mờ broă ngui măi mok pa do geh dong bơsong, kơryan mờ lơh glài di tŭ ală broă mus kơl brê, sơ gràm ù gam gơ gơs là tiah gơlik geh uă ngan broă do tàm ƀòn dờng.

Cau mblàng K’Duẩn