Ồng Võ Văn Thưởng là kwang đơng lam tờm Đảng mờ Dà lơgar dê, geh bơsram tơl, gơs dờng pràn bơh tàm ală tiah, geh jào at uă gơnoar broă đơng lam kwơ màng Đảng mờ Dà lơgar dê. Mơya, pa do jăt jơnau yal bơh Ủy ƀan sền sơwì Dà lơgar mờ ală anih lơh broă geh gơnoar, Ồng neh gơtìp tìs bè ală bơta đảng viên ờ geh lơh, bè kơnòl lơh krơh bơh kwang bàng, đảng viên, lài jơh là Kwang geh jơng tàm Ƀộ Cíñ trị, Kwang geh jơng tàm Ƀan Ƀí thư, Kwang geh jơng tàm Mpồl đơng lam Đảng Dà lơgar mờ dờp kơnòl cau lam bồ jăt ală jơnau cih bơh Đảng mờ adăt boh lam bơh Dà lơgar dê.

Ală bơta tìs, bơta ờ di bơh ồng Võ Văn Thưởng dê neh lơh geh jơnau pơneh ờ niam tàm mpồl bơtiàn, lơh gơrềng ờ niam tus mờ bơngă pin dờn Đảng, Dà lơgar mờ să tờm Ồng dê. Git wă loh kơnòl tềng đăp Đảng, Dà lơgar bal mờ Làng bol, Ồng neh geh sră dan lời at ală gơnoar broă geh jào mờ ơm lơh broă. Jăt tàm jơnau cih gam geh ngu tŭ do bơh Đảng, Dà lơgar bal mờ sền jăt jơnau kơ̆p kờñ bơh ồng Võ Văn Thưởng dê, Mpồl đơng lam Đảng Dà lơgar ring bal ai ồng Võ Văn Thưởng in lời at gơnoar ală kơnòl broă: Kwang geh jơng tàm Ƀộ Cíñ trị, Kwang geh jơng tàm Mpồl đơng lam Đảng Dà lơgar khoă XIII, Củ tịc lơgar Kộng hoà xã hội củ nghĩa Việt Nam, Củ tịc Mpồl duh broă sền gàr dà lơgar mờ lơngăp lơngai tơngai bơh nam 2021 tus 2026.