VOV4.K’ho - Drim òr (14/06), Hội đồng Ñân zân (HĐÑZ) ƀòn dờng Đà Nẵng bơyai lơh pơrjum jăt tơngu me mờ bơyai lơh broă kwang bàng gơwèt gơnoar bơh HĐÑZ ƀòn dờng.

                                     Pơrjum dơ̆ 6, pơrjum jăt tơngu me HĐÑZ ƀòn dờng Đà Nẵng

Tàm pơrjum do HĐÑZ ƀòn dờng Đà Nẵng neh ring bal Nghị quyết tơn jơh gơnoar broă Phó Củ tịc HĐÑZ ƀòn dờng mờ tơn jơh Kwang bàng ala măt HĐÑZ ƀòn dờng Khoă 10, tơngai lơh broă bơh nam 2021 tus 2026 gơwèt mờ ồng Lê Minh Trung. Lài mờ hơ̆, tàm pơrjum bơh Ƀan Ƀí thư geh Tổng Ƀí thư ồng Nguyễn Phú Trọng đơng lam, Ƀan Ƀí thư neh tơlik kơrnoăt lơh glài mờ broă: Tơn jơh ală gơnoar broă tàm Đảng gơwèt mờ ồng Lê Minh Trung, kwang geh jơng tàm Ƀan Thường vụ Thàñ ủy, Phó Ƀí thư Đảng đoàn, Phó Củ tịc Thường trực HĐÑZ ƀòn dờng Đà Nẵng. Ồng Trung neh ờ tơl niam tàm broă bơsram bơtơl, bơsram tàp, gàr niam nùs nhơm, rài kis; tìs mờ kơrnoăt bè ală bơta cau geh đảng ờ geh lơh, Kơrnoăt bè kơnòl lam lài, tìs mờ adăt gùng tam bao mờ hìu nhă. Tìs bơh ồng Lê Minh Trung lơh gơtìp ờ niam tàm nùs nhơm mpồl bơtiàn, lơh gơrềng tus mờ bơngă bơh đảng, anih lơh broă dà lơgar mờ bơh cau geh đảng dê.

Cau mblàng Ndong Brawl