VOV4.K’ho- Kụk atbồ cau lơh broă bơdìh lơgar (Ƀộ Lao động, Thương ƀiñ mờ Xã hội) pà git, tơnơ̆ tŭ tơngai ơm ing tài bơh kòp Kovid-19 bơtờp uă, bơh ngai 15/02, Đài Loan (lơgar Lo) pờ mpồng dờp jơh cau lơh broă lơgar ndai bơh Việt Nam, Indonesia, Thái Lan mờ Philippines dê tus lơh broă.

Do là tŭ niam ai cau lơh broă in kờñ tus Đài Loan (lơgar Lo) lơh broă, mờ priă nhai bơh sơn rờp pơgap 20 tơlak đông dùl nhai. Lài mờ tŭ mut tàm Đài Loan (lơgar Lo) lơh broă, cau lơh broă pal cit tơl ding sơnơm vaccine kòp Kovid-19 mờ xét nghiệm PCR 48 jơ lài mờ tŭ lik bơh lơgar tờm. Tơnơ̆ tŭ mut tàm bồt do, cau lơh broă pal lơh gơs broă ơm yah ngài 14 ngai tàm hìu nac, tơnơ̆ hơ̆ pơn jat tai gròi sền pràn kơldăng să jan tàm 7 ngai pơn jat tai lài mờ tŭ tus anih lơh broă. Ală biwnah priă ơm yah ngài tàm hìu nac nàng rơcang sơndră kòp Kovid-19 geh bơh cau tờm ơpah cau lơh broă tă tơm. Bơdìh mờ cau lơh broă tàm ală hìu măi mờ dong broă hìu bơnhă in, Việt Nam mờ Đài Loan (lơgar Lo) kung neh ring bal nàng đah Đài Loan (lơgar Lo) dờp cau lơh broă gah lơh sa suơn sre bơh Việt Nam dê.

Cau mblàng K’Duẩn