VOV4.K’ho- Đại sứ Việt Nam tàm lơgar Mỹ ồng Nguyễn Quốc Dũng neh geh dơ̆ cribơyai mờ mò Sarah Bianchi, Phó kwang ala mat kă bro lơgar Mỹ. 2 gah neh ring bal bè bơta kuơmàng bơh broă tơnguh ală tơngume lơh broă bal bè lơh sa, kă bro đah Mỹ mờ tiah do mờ Việt Nam.

Tàm dơ̆ tìp mat, Đại sứ Nguyễn Quốc Dũng mờ mò Sarah Bianchi neh đơs niam bơta bơtàu tơnguh tàm git gơp lơh sa- kă bro đah 2 lơgar tàm tơngai lài. 2 gah cribơyai bè 2, 3 gah lơh broă bal mờ sền gròi bal tàm git gơp kă bro đah Việt Nam mờ Mỹ mờ ring bal bè bơta kuơmàng bơh broă tơnguh ală tơngume lơh broă bal bè lơh sa- kă bro đah Mỹ mờ tiah do mờ Việt Nam. Đại sứ Nguyễn Quốc Dũng kơp kờñ 2 gah gàr sùm lơh broă bal, cribơyai jơh nùs tàm ală broă gam krơi is. Phó Kwang ala mat kă bro lơgar Mỹ mò Sarah Bianchi jờng rơ Đại sứ Nguyễn Quốc Dũng tus càr lơgar Washington, kơp kờñ geh pơn jat tai lơh broă jơh nùs mờ Đại sứ mờ Đại sứ quán Việt Nam nàng tơnguh lơh broă bal lơh sa mờ kă bro đah 2 lơgar.

Cau mblàng K’Duẩn