Cồng nha ồng Tô Lâm, Kwang geh jơng tàm Ƀộ Cíñ trị, Ƀộ trưởng Ƀộ Kwang àng, Kwang bàng ala măt Quốk hội khoă XV gơwèt Mpồl Kwang bàng ala măt Quốk hội càr Hưng Yên neh geh Quốk hội pồ at gơnoar broă Củ tịc lơgar CHXHCN Việt Nam, tơngai lơh broă bơh nam 2021 tus 2026.

Nghị quyết bè broă pồ ồng Tô Lâm at gơnoar broă kung geh ală kwang bàng Quốk hội pờ tê ring bal mờ 472 tàm 473 nă kwang bàng tus bal pờ tê ring bal (geh 96,92% kờp jơh kwang bàng Quốk hội). Củ tịc lơgar pa yal guh dờp at gơnoar broă dờn song mờ Dà lơgar, Làng bol mờ Sơnoa bơh lam tềng đăp Quốk hội tŭ dờp at gơnoar broă. Đại tướng ồng Tô Lâm deh nam 1957, ƀòn tờm xã Nghĩa Trụ, kơnhoàl Văn Giang, càr Hưng Yên; là Giáo sư Khoa họk An ninh, Tiến sĩ Luật họk. Ồng là Kwang geh jơng tàm Đảng Dà lơgar khoă XI, XII, XIII; Kwang geh jơng tàm Ƀộ Cíñ trị khoă XII, XIII mờ là Kwang bàng Quốk hội khă XIV, XV. Bơh nam 1988 tus 1993, ồng Tô Lâm lơh Phó kwang atbồ cơl dŭ lơh broă hơ̆ sồng Kwang atbồ cơl dŭ lơh broă Kụk sền gàr cíñ trị I hơ̆ sồng Kwang atbồ Kụk Sền gàr cíñ trị III, Ƀộ Kwang àng bơh nam 2006 tus 2009, ồng Tô Lâm lơh Phó Kwang atbồ Tổng kụk An ninh I, Ƀộ Kwang àng. Ồng Tô Lâm at gơnoar broă Thứ trưởng Ƀộ Kwang àng bơh nhai 8 nam 2010 tus nhai 4 nam 2016. Tơnơ̆ mờ hơ̆, ồng at gơnoar broă Ƀộ trưởng Ƀộ Kwang àng tus tŭ do.