VOV4.K’ho- Di dơ̆ lòt lơh broă tàm Tây Nguyên, mho ngai 19/09, Đại tướng ồng Tô Lâm, Ủy viên Ƀộ Cíñ trị, Ƀộ trưởng Ƀộ Kwang àng, Phó Kwang ătbồ Mpồl đơng lam Dà lơgar bè rơcăng sơndră sa kwề sa kwà, bơta ờ niam neh lơh broă mờ Ƀan Thường vụ Tỉñ ủy Kon Tum. Tàm dơ̆ lơh broă, Ƀan Thường vụ Tỉñ ủy Kon Tum yal mờ Đại tướng ồng Tô Lâm bal mờ Mpồl lơh broă in bè broă lơh sa- mpồl bơtiàn mờ broă lơh gàr niam lơngăp lơngai, rơndăp tăp sèng ờdo ờdă, rơcăng sơndră sa kwề sa kwà, bơta ờ niam tàm ù tiah càr dê.

Đại tướng ồng Tô Lâm đơs tàm dơ̆ lơh broă mờ Ƀan Thường vụ Tỉñ ủy Kon Tum

Jơnau yal pà gŏ, bơh bồ tơngai lơh broă tus tŭ do Tỉñ ủy, Ƀan Thường vụ Tỉñ ủy Kon Tum neh lơh jăt ngan ngồn mờ lam lơh ală gùng dà broă lơh mờ kơrnoăt bơh Dà lơgar dê bè bơtàu tơnguh wơl, bơtàu tơnguh lơh sa- mpồl bơtiàn mờ lơh geh bàr pe cồng nha kwơmàng ngan tàm ală gah broă lơh. Tàm 06 bồ nam 2022 do, tă dia Dà lơgar geh pơgăp 2 rbô 330 tơmàn đong, lơh geh rlau 58% kờp dŭ lài, gơguh 830 tơmàn đong pơndrờm bal dùl tŭ mờ nam 2021.

Kung tàm dơ̆ lơh broă do sơl, Ƀan Thường vụ Tỉñ ủy Kon Tum yal mờ Đại tướng ồng Tô Lâm bal mờ Mpồl lơh broă in bè broă sền gàr lơngăp lơngai rơndăp tăp sèng, rơcăng sơndră sa kwề sa kwà, bơta ờ niam tàm ù tiah càr dê. Đại tướng ồng Tô Lâm, Ủy viên Ƀộ Cíñ trị, Ƀộ trưởng Ƀộ Kwang àng, Phó Kwang ătbồ Mpồl đơng lam dà lơgar rơcăng sơndră sa kwề sa kwà, bơta ờ niam cih dờp ală jơnau đơs, jơnau sồr bơh Ƀan Thường vụ Tỉñ ủy Kon Tum dê.

Cau mblàng Lơ Mu K’Yến