VOV4.K’ho- Đại tướng Võ Nguyên Giáp “Cau bi dờng” bơh ling klàng làng bol Việt Nam dê, cau lơh broă ling klàng, cau lơh broă cíñ trị, cau lơh broă mờ lơgar ndai jak chài ngan geh làng bol jơh gùt lơgar mờ dunia sền ngềr ngan. Broă lơh, dà kơl hề mờ krơh niam bè nùs nhơm, broă lơh bơh Đại tướng dê neh gơ gơs là dùl nơm rùp ờ tŭ lơi chơ̆t tàm nùs nhơm tơl nă làng bol Việt Nam dê. Gơwèt mờ làng bol ală jơi bơtiàn tiah ờdo ờdă Bắc Sơn, càr Lạng Sơn, kir sơnrai bè dơ̆ Đại tướng lòt còp; ală jơnau nting tơngkah mờ bơta rềp mềl, pơn dềt să tàm rài kis bơh Đại tướng kah yau dê là bơta chờ hờp mờ bơta gơn kơnờm dờng màng ngan nàng tơl nă  làng bol tàm ƀòn lơgar kăc màng Bắc Sơn in sùm lơh ngan mờ pơnđơl pràn sùm.

Bulah neh 27 nam lòt gan mơya tàm bồ tơngoh bơh ồng Dương Minh Thuận dê (lài do là Phó Kwang atbồ Mpồl hòi jà làng bol Tỉñ ủy Lạng Sơn) kung gam kah bè ờs rùp hin Đại tướng ồng Võ Nguyên Giáp dê tàm ƀlàng dờng hòi jà Bắc Sơn mho ngai hơ̆ dê. Ồng Thuận là cau geh bơta chờ hờp ngan tus tơn wă Đại tướng Võ Nguyên Giáp tàm jơng ntùng rơndeh par duk mho ngai 26/9/1995 tŭ Đại tướng rê còp ƀòn lơgar Bắc Sơn- tiah Ờdo ờdă dà lơgar dê tàm rài tam lơh mờ bol sò tơm Tây. Drim ngai tơnơ̆, Đại tướng neh geh dơ̆ tơm bơh bơr mờ làng bol ală jơi bơtiàn kòn cau mờ cau ling mpồl ling phàu crong dê.

Ală pang rùp bè Đaị tướng Võ Nguyên Giáp bulah neh jŏ ngan mờ tŭ tơngai mơya kung gam mpờl gŏ geh rùp să song niam jak chài ngan bơh Đại tướng kah yau jơi bơtiàn dê

Ồng Dương Minh Thuận đơs: Đại tướng nting tơngkah Bắc Sơn là kơnhoàl neh geh bơhiàn Kăc màng rau, mơya pal brồ guh nàng tơn jơh jơgloh tơrmù rƀah, brồ guh nàng lơh pas. Mờ bè hơ̆ Đại tướng lùp Đảng ƀộ Làng bol Bắc Sơn dùl nùs ring bal sơl, jơh ƀlàng dờng bulah ờ geh cau lơi đơs jat wơl mơya ndrờm đơs dùl jơnau bal là dùl nùs bal, hơ mờ Đại tướng. Tŭ jơh jơnau đơs tàm dơ̆ mĭt tiñ, Đại tướng neh còp să làng bol mờ jơnau đơs dà kòn cau bơh cau Tày Bắc Sơn dê.

Tàm Bảo tàng khởi nghĩa Bắc Sơn tŭ do kung gam prăp uă jơnau cih, rùp hin tŭ Đại tướng ồng Võ Nguyên Giáp lòt còp Bắc Sơn nam 1995 bal mờ ală jơnau nting tơng kah ling mờ làng bol Bắc Sơn pal “lơh jat bơhiàn ƀòn lơgar khin cha jak chài, bơt bơtàu kơnhoàl tờm gơ gơs là dùl kơnhoàl krơh niam lam lài bơh càr dê”; tờm chi “pas gơs” geh Đại tướng kah yau tam tàm ngai hơ̆, tŭ do kung gam gơ lì mƀur lơngờm mrềt tàm ƀlàng Ƀảo tàng dê.

Kwang bàng Ƀảo tàng khởi nghĩa Bắc Sơn yal năc in bè tờm chi pas gơs geh Đại tướng Võ Nguyên Giáp tam tàm ngai 27/9/1995

Bi Phạm Thị Thanh Hà, kwang bàng Ƀảo tàng khởi nghĩa Bắc Sơn, ngoh rơngăc đơs: Ƀảo tàng kung là dùl tiah tus uă bơh năc dê tŭ tus mờ Bắc Sơn. Do là ală sră nggal tờm mờ kwang bàng Ƀảo tàng neh jòi sền mờ ơn prap, pơgồp bơnah bơto bơtê wơl bơhiàn ai ală rơnàng làng bol in, ngan là rơnàng kơnòm să in sùm cih kah mờ kah sùm dà kơl hê bơh ală cau ling khin cha jak chài dê. Do kung là bơta pơn iờ să ngan bơh Đảng ƀộ, gơnoar atbồ mờ làng bol ală jơi bơtiàn kơnhoàl Bắc Sơn dê tŭ geh Đại tướng rê còp. Năc tus tàm do sùm geh uă ngan jơnau lùp bè Đại tướng, ngan là ală kơnòm bơsram, ală kơnòm kờñ gĭt ngan, chờ hờp ngan tŭ geh jòi gĭt bè Đaị tướng ồng Võ Nguyên Giáp.

Mờr 10 nam Đại tướng rê mờ ală cau ling bal neh khin cha jak chà chơ̆t phi să ai bơta lơngap lơngai is, khat gơboh bơh dà lơgar dê. Lơh jat jơnau nting tơngkah Đại tướng dê, làng bol kòn cau ală jơi bơtiàn mờ kwang bàng, cau ling mpồl ling phàu crong Bắc Sơn neh bal mờ gơ̆p tam klăc bal, lơh ngan bơtàu tơnguh lơh sa- mpồl bơtiàn, gàr kơ̆ bơta lơngap lơngai, sền gàr dà lơgar tàm ù tiah ƀòn lơgar kăc màng.

Cau mblàng K’Hạnh