VOV4.K’ho - Mho òr (20/09), Mpồl kwang bàng lơh broă bơh Mpồl đơng lam Dà lơgar bè broă sơndră mờ sa kuề sa koà, ờ niam geh Đại tướng Tô Lâm, Phó kwang atbồ Mpồl đơng lam Dà lơgar bè sơndră mờ sa kuề sa koà, ờ niam lam bồ neh geh dơ̆ lơh broă mờ Ƀan Thường vụ Tỉñ ủy Dăk Nông.

           Đại tướng Tô Lâm lơh broă mờ Ƀan Thường vụ Tỉñ ủy Dăk Nông bè broă sơndră mờ sa kuề sa koà

Jăt jơnau yal bơh Ƀan Thường vụ Tỉñ ủy Dăk Nông dê, broă sơndră mờ sa kuề sa koà, ờ niam tàm tơngai do geh càr sền gròi, đơng lam, lam sồr mờ lơh jăt geh cồng nha. Tŭ do, Mpồl đơng lam sơndră mờ sa kuề sa koà, ờ niam càr dê gam sền gròi, đơng lam 16 broă yă, broă kal ke geh pơnrơ ờ niam tàm càr do dê; gŏ mờ jào anih lơh broă kwang àng lùp khào 3 broă geh tơngŏ sơgràm gơnoar atbồ, gơnoar broă tàm broă lơh jăt kơnòl. Càr neh geh 31 dơ̆ mờ 52 nă cau gơtìp yă, lùp khào bè ală tìs sa kuề sa koà, lơh sa.

Đơs tàm dơ̆ lơh broă, Đại tướng Tô Lâm sồr tàm tơngai tus càr pơn jăt tai tơnguh broă đơng lam, lam sồr mờ bơyai lơh jăt, tàm hơ̆ uă ngan là ờ uă tơngu me tờm bè broă tơnguh uă rơlao tai jơnau git wă, kơnòl bơh ală kấp ủy, gơnoar atbồ càr; lơh jăt niam kơrnoăt pơgồp bal tàm broă gŏ, bơsong ală broă, broă sa kuề sa koà, lơh sa; chồl mhar broă lùp khào, bơsong ală broă pơgồp bal mờ broă lơh jăt ndrờm bal ală broă sơndră mờ sa kuề sa koà, ờ niam. Đại tướng Tô Lâm đơs là, mờ broă chồl mhar ală broă sơndră, sò tơm kơrian cau tìs, tơnguh bơtàu lơh sa mpồl bơtiàn, càr pal sền gròi rơlao tai tus mờ broă tơmù rơƀah, drơng gàr rài kis ai làng bol in.

Cau mblàng Ndong Brawl