Dơ̆ pơrlòng kwơ màng “120 broă lơh, bơnah broă lòt bal mờ cau ùr, kơnòm dềt rơƀah geh rài kis gơtìp kal ke” tơrgùm tàm ală broă dong kờl bè priă, bơto broă lơh, ai broă lơh cau ùr in. Tàm dơ̆ lam lơh drim ngai 01 nhai 03, Mpồl cau ùr càr Dăk Lăk kung neh bơyai lơh lòt dờp bal “Poh ào kăp”.

Jăt mờ hơ̆, bơh tŭ do tus jơh ngai 08 nhai 03 tus, lam kwang bàng mpồl ală kấp mờ kwang bàng cau ùr tàm mpồl lơh broă cíñ trị lơh jăt broă soh ào kăp tŭ tus tàm anih lơh broă, hìu lơh broă, tus lơh broă, tus pơrjum… Bơh tŭ hơ̆ ai geh bơta gơrềng bal tàm mpồl bơtiàn mờ lam lơh geh nùs nhơm git bal tàm broă prăp gàr, ngui bơta kwơ bơh ào kăp-Phan lời wơl niam chài lơgar Việt Nam dê.