Drim ngai 21/4, tàm ƀòn dờng Buôn Ma Thuột, Ủy ƀan Ñân zân càr Dăk Lăk, Mpồl cau jàm kờñ gơboh dà lơgar neh yŭ rơyùm bơyai lơh tơngkah 50 nam ngai jàu cau ling jàm jat Hiệp địñ Paris (1973- 2023). Tus bal dơ̆ bơyai lơh tơngkah geh rlau 150 nă cau ling jàm, cau jàm cíñ trị gơtìp bol sò tơm kup krơ̆ tàm dơ̆ tam lơh dră wơl bol sò tơm Mỹ tơngklàs dà lơgar. Tàm dơ̆ tơngkah, ală cau ala mat neh bal mờ gơp kah wơl bơhiàn tam lơh khin cha jak chài bơh cau ling kac màng Việt Nam dê.

Ala mat kwang đơng lam bồ càr Dăk Lăk neh pơyua jơnau ưn ngài tus ală cau jàm lài do kờñ gơboh dà lơgar, kơp kờñ ală cau jàm lài do pơn jat tai tă pơgồp, mblàng wơl bơta kờñ gơboh kung bè tam pà mờng chài nàng cau kơnòm să in ngui niam nùs nhơm kac màng tàm broă bơt bơtàu mờ sền gàr dà lơgar. Mờ kung pơyua jơnau lùp còp tus cau pròc mhàm tờm, gơp bơyô mờ pà ală bơnah phan ală cau jàm lài do in.