VOV4.K’ho- Ủy ƀan Ñân zân càr Dăk Lăk pa tơlik broă rơndap lơh sồ 15 bè lam lơh rơndap broă dong kờl bơto broă lơh, lam cau lơh broă rê wơl anih lơh broă yau, jòi geh broă lơh ai ală cau lơh broă bơh càr dê rê bơh ală càr, ƀòn dờng tiah đah jum dà lơgar tài gơ rềng bơh kòp Kovid-19.

Dăk Lăk geh mở 40 rbô nă cau tàm sơnam lơh broă rê bơh tiah geh kòp

Jat hơ̆, jơnau kờñ geh ai tơlik là 100% khà cau lơh broă càr Dăk Lăk dê (pơgap rlau 40 rbô nă) rê bơh tiah geh kòp tàm sơnam lơh broă geh jơnau kờñ dong kờl bơsram broă lơh, jòi broă lơh tàm càr, lơh gơlik is broă lơh halà rê wơl anih lơh broă yau geh dờp broă dong kờl. Tơngai lam lơh bơh bồ nam do tus jơh nam 2023, mờ kờp jơh priă tă lơh kờp dŭ mờr 248 tơmàn đông. Càr Dăk Lăk geh chồl pràn broă lam lơh pơlam jòi broă lơh ai cau lơh broă in, lam lơh bơto broă lơh dipal mờ bơta geh ngan, gàr niam bơta lam lơh ngan ngồn, sơlơ tơnguh rlau tai broă bơto broă lơh gơ jat bal mờ ală mpồl lơh sa kă bro, anih lơh sa kă bro, yal tơnggit jòi broă lơh ai cau bơsram in tơnơ̆ tŭ lik klờng.

Cau mblàng K’Duẩn