Drim ngai 27/9, Liên đoàn Kwang đơng lam bồ mờ Cau lơh sa kă bro kơnòm să dunia tàm lơgar Việt Nam pơgồp bal mờ Mpồl cau ùr lơh sa kă bro ƀòn dờng Buôn Ma Thuột mờ Huyện đoàn kơnhoàl Cư Mgar bơyai lơh broă lơh jàu pà măi tíñ mờ sră ai kơnòm bơsram Hìu bơsram kâp 1 Y Jut, xã Ea Hđing, kơnhoàl Cư Mgar, càr Dăk Lăk in. Broă lơh neh jàu pà 30 nơm măi tíñ mờ 2 rbô pang sră mờ kờp jơh khà priă mờr 200 tơlak đông.

Jat ồng Nguyễn Xuân Nhạc, Kwang atbồ Hìu bơsram kâp 1 Y Jút pà git, hìu bơsram tŭ do geh 670 nă kơnòm bơsram, tàm hơ̆ kơnòm bơsram jơi bơtiàn dùl êt nă cau geh rlau 70%, ală măi tíñ mờ sră măi, sră jak chài mờ sră yal mờ rùp sềr rơp dong ală oh geh git ală jơnau bơto bơsram tin họk, kông nghệ thông tin mờ tơnguh niam chài sền sră. Bơh hơ̆, tơnguh tai bơta pràn, bơta gơn kơnờm nàng ală oh in ngai sơlơ pơn đơl pràn bơsram sră. Bal mờ broă lơh jàu pà măi tíñ mờ sră ai kơnòm bơsram Hìu bơsram kâp 1 Y Jut in, tàm mang ngai 27/9, mpồl gam bơyai lơh broă lơh “Trung thu oh in” mờ jàu pà 400 bơnah phan ai ală oh dềt tàm ƀòn Đrao, xã Cư Dliê M’nông, kơnhoàl Cư Mgar in.