VOV4.K’ho- Drim ngai 29/05, tàm thị xã Ƀuôn Hồ, Tỉñ đoàn Dăk Lăk bơyai lơh dơ̆ ai cau lòt lơh broă ơruh pơnu dong kờl is kàl rơlô bơkang nam 2022 mờ uă broă lơh duh hồl tàm 15 kơnhoàl, thị xã, ƀòn dờng tàm càr Dăk Lăk dê mờ bơta tus bal bơh rlau 10 rơbô nă đoàn viên, ơruh pơnu gùt càr.

Dăk Lăk: Ai cau lòt lơh broă ơruh pơnu dong kờl is kàl rơlô bơkang nam 2022

Tàm dơ̆ ai cau lòt lơh broă, Tỉñ đoàn Dăk Lăk neh ai khà priă 150 tơlak đong dong kờl bơsong broă lơh ai ơruh pơnu in. Pà 200 tờm chi, 1 broă lơh sòl àng gùng lòt ƀòn lơgar, hìu ơm nùs nhơm niam, broă lơh tiah nhơl chờ lơh rài bồ tơngoh ai kơnòm dềt in mờ dong kờl lơh 1 nơm ƀlàng hìu mpồl bơtiàn mờ kờp jơh priă tă 370 tơlak đong. Bi H Giang Niê, Ƀí thư Tỉñ đoàn Dăk Lăk pà gĭt, ală broă lơh tàm broă lơh ơruh pơnu dong kờl is kàl rơlô bơkang nam 2022 nàng kờñ lơh jat niam nùs nhơm lơh lài, dong kờl is bơh ơruh pơnu dê tàm broă tus bal bơtàu tơnguh lơh sa- mpồl bơtiàn; bơt bơtàu ƀòn lơgar pa, tiah drà ngăc ngar; sền gàr niam bơta lơngap lơngai- mpồl bơtiàn, sền gàr dà lơgar, sền gàr lơngap lơngai, ngan là tàm ală tiah kal ke, tiah sar lơgar ngai, tiah nhàr lơgar.

Cau mblàng K’Hạnh