Drim òr (10/03), Ƀộ NN mờ PTNT pơgồp bal mờ UɃÑZ càr Dăk Lăk bơyai lơh ai ngui bơtơ̆t rơbòng dà lơh rơlao 1rơbô 600 tơmàn đong – do là broă lơh tơnao dơng dà Ea H’leo 1, broă lơh geh kwơ màng ngan gơwèt mờ ù tiah ờ geh dà tàm kơnhoàl Ea H’leo dê. Phó Thủ tướng Cíñ phủ ồng Trần Lưu Quang tus pơrjum ai ngui rơndăp broă lơh do.

Rơndăp broă lơh Tơnao dơng dà Ea H’leo 1 geh Ƀộ NN mờ PTNT kĭ bơcri priă lơh tàm nam 2017, mờ khà dà geh ai lơh 26 tơlăk khối. Do là broă lơh sơnrờp ngan tàm càr Dăk Lăk mờ tiah Tây Nguyên dê geh bơtơ̆t kơrian dà dờng lơh gơs tơnao dơng dà geh lơh mờ bơtơ̆t bê tông kơl jăp, ngui phan tro bay. Tơnao dà do geh ngui dà dờng Ea H’leo nàng ai dà tuh tơl ală phan tam geh bơta kwơ lơh sa uă tàm kơnhoàl do in; ai dà drơng tàm rài kis, ròng phan, lơh sa mờ măi mŏk, nhơl chờ... pơgồp bal tàm broă bơ̆t bơtàu wơl lơh sa suơn sre jăt gùng dà broă lơh tơnguh uă bơta kwơ mờ tơnguh bơtàu kơl jăp, tơnguh uă rài kis làng bol in. Jăt broă geh ai lơh, broă lơh do tŭ geh ngui lơh broă mờ geh ai dà tuh 5 rơbô lồ ù lơh sa, ai geh dà ngui sa di pơgăp 15 rơbô nă làng bol tàm tiah geh rơndăp broă lơh do in.