Jat jơnau yal tàm dơ̆ pơrjum, nam 2022, broă lơh sa- mpồl bơtiàn bơh càr Dăk Lăk dê neh geh ală tam gơl niam ngan. Jơh ală broă geh jàu tờm ngan jat Nghị quyết ai tơlik neh lơh gơtùi. Tàm hơ̆, 6 broă geh jàu bè lơh sa pơn rơ ngan sơrlèt rlau broă rơndap lơh ai tơlik. Priă lơh geh bơh kờp jơh phan lơh gơs kờp dŭ rlau 58 rbô 300 tơmàn đông, gơguh rlau 8,9% pơndrờm mờ nam 2021. Uă gah broă lơh gam brồ guh mờ ai wơl khà gơguh lơh sa, bè lơh sa suơn sre, ròng mờ tam phan tàm dà, tac phan hờ lơgar ndai, gơ hòi gơ jà nac nhơl chờ mờ broă drơng ala, crơng gơs pa mpồl lơh sa kă bro… ndrờm geh khà gơguh jơnhua pơndrờm mờ bal dùl tŭ nam lài.

Broă lơh bơto bơsram, niam chài, mpồl bơtiàn, lơh sơnơm, gàr niam rài kis mpồl bơtiàn pơn jat tai geh sền gròi lam lơh niam, sền gàr dà lơgar, sền gàr lơngăp lơngai, ring niam mpồl bơtiàn geh gàr kơ̆. Bơdìh mờ ală cồng nha lơh geh, Dăk Lăk kung gam 2, 3 bơta ờ niam, bè: broă geh jàu bè khà jơm glòm brê mìng geh rlau 38%. Broă ai priă bơcri dà lơgar lơyah, mìng geh 29,5% broă rơndap lơh; bơta ờ tơl sơnơm, phan lơh sơnơm tàm ală hìu sơnơm dà lơgar lơyài geh bơsong lơh gơbàn ờ suk tàm làng bol.