VOV4.K’ho- Tài gơrềng bơh kòp Kovid-19, uă ngan kơnòm bơsram mầm non tàm càr Dăk Lăk ờ gơtùi lòt bơsram tơn tàm hìu bơsram. Ngan là kơnòm dềt tàm ƀòn dờng Buôn Ma Thuột, kờp jơh tŭ jiơ bơsram tơn tàm hìu bơsram ờ hềt tus 2 poh.

Nàng mè bèp kơnòm bơsram in iang nùs mờ ai tơl bơta ƀươn ngan rlau jơh ai kơnòm dềt 5 sơnam in mŭt ơdŭ 1, Sở Giáo zụk mờ Đào tạo càr Dăk Lăk gam lơh jăt uă broă lơh dong kờl mpồl kơnòm dềt tàm sơnam do. Nàng ai tơl bơta ai kơnòm dềt 5 sơnam in mŭt bơsram ơdŭ 1, Kwang ătbồ Sở Giáo zụk mờ Đào tạo càr Dăk Lăk ồng Phạm Đăng Khoa pà gĭt, Sở neh sồr ală hìu bơsram lơh video pơlam mè bèp kơnòm bơsram lơh jăt broă bơto bơtê, sền gàr mờ ngan là bơta chài ai kơnòm dềt 5 sơnam in. Tàm hơ̆, gơwèt mờ ală hìu bơsram krơi is geh gal kơnòm bơsram là làng bol kòn cau dùl êt nă cau, geh ală sau đơs dà yoan ờ hềt chài ngan, cau pơgru pal pơgồp bal niam mờ hìu bơnhă nàng dong kờl, bơto pơlam kơnòm bơsram sơlơ bơsram dà Yoan lài mờ tŭ mŭt bơsram ơdŭ 1.

Cau mblàng Lơ Mu K’Yến