VOV4.K’ho - Tàm càr Dăk Lăk tŭ do geh tus 36 broă lơh dà kloh tơrgùm bal tàm ƀòn neh gơtìp ờ gơtùi lơh broă, gơmù bơta pràn lơh broă, ờ gơtùi lơh broă. Bơta do lơh gơtìp hoàc huơr kes priă tŭ tơl broă lơh ndrờm bơcri uă tơmàn đong, mơya làng bol kung gam ờ geh dà ngui sơl.

                       Tàm gùt càr Dăk Lăk tŭ do geh 36 tàn 123 broă lơh dà kloh ờ gơtùi lơh broă

Broă lơh dà ngui sa tàm ƀòn Trap, xã Cư̆ Mgar, kơnhoàl Cư̆ Mgar geh bơcri priă lơh bơh nam 2017 tus 2019 den geh lơh gơs. Kờp jơh khà priă bơcri rơndăp broă lơh là 12 tơmàn đong bơh tàm kes priă, ai dà ngui sa kloh niam mờr 500 hìu làng bol kis tàm ƀòn Linh, ƀòn Trap mờ ƀòn Thung in. Mò H’ Bun Kbuôr kis tàm ƀòn Trap yal, broă lơh dà mìng geh ngui 2, 3 nhai den ơm ờ lơh broă tàm 3 nam do tơn, tŭ do sơbì gời, ñhơ̆t hòn uă. Hìu nhă gam gơtìp kal ke bè dà ngui sa: “Ờ geh dà măi nàng ngui, hìu nhă ngui wơl mờ dà tơlung. Kàl prang den dà tơlung soăt, bol añ pal lòt yòng dà ha là blơi dà mờ khàr nàng ngui sa; gam dà um, pìh phan den ai rơndeh lơ-òr pơn diang bơh tàm tơnao dà lơh bơtơ̆t rơbòng dà”.

Mblàng bè broă tài bè lơi broă lơh dà kloh 12 tơmàn đong mìng geh ngui 2, 3 nhai, mò Phạm Thị Tiềm, Củ tịc UɃÑZ xã Cư̆ Mgar pà git, geh bơta do là tài broă atbồ, lơh broă ờ geh cồng nha. Lài ngan, xã jào ai 3 nă kwang atbồ ƀòn in tus bal tàm broă atbồ, lơh broă. Geh 2, 3 nhai, jơh 3 nă kwang atbồ ƀòn jào wơl broă lơh do xã dê mờ jơnau tờm ngan là ờ geh tă priă bơh làng bol nàng tơn priă ồs đèng.

  Ală broă lơh dà kloh tàm ƀòn gơtìp ờ gơtùi ngui, lơh hoàc huơr uă tơmàn đong tàm kes priă, làng bol ờ geh ngui

Nam 2020, xã crơng gơs Mpồl lơh broă tàm broă lơh dà kloh ƀòn Trap. Mơya tài ờ git tàm broă lơh bal mờ broă tă priă bơh làng bol gơtìp kal ke den tàng broă lơh do pơn jăt tai gơtìp ơm ờ lơh broă. Mò Phạm Thị Tiềm đơs loh rơlao tai: “UɃÑZ xã geh jơnau jào ai Anih dà kloh mờ kloh niam tiah kis bơh Sở Nông nghiệp mờ Phát triển Nông thôn nàng atbồ lơh broă, tàm UɃÑZ xã bol añ den ờ geh cau git atbồ broă lơh do. Bol añ ờ sŭk ngan bè ờ gơtùi lơh broă tàm bơta phan do, tàm bơta phan ne tàm ù mờ măt bè ờs sền ờ git nàng lơh niam wơl gơtùi. Den tàng pal jào wơl mờ mpồl lơh lơh broă tờm nàng lơh broă geh cồng nha”.

Jăt jơnau sền wơl bơh Anih lơh dà kloh mờ kloh niam tiah kis càr Dăk Lăk pà gŏ, gùt càr geh tus 36 broă lơh tàm 123 broă lơh dà kloh tơrgùm bal tàm ƀòn neh gơtìp ờ gơtùi lơh broă, ơm ờ gơtùi lơh broă. Geh bơta tờm tài broă bơcri priă ờ uă, cau ngui ờ uă, tàm bơta khà priă pal tă nàng lơh broă uă neh lơh broă tă priă ờ tơl. Ală broă lơh ndrờm geh jào ai xã ha là geh tŭ mpồl kwang bàng atbồ ƀòn in atbồ lơh broă; kwang bàng git tàm broă lơh ờ geh den tàng lơh gơtìp hoàc huơr, lơh gơtìp ờ gơtùi lơh broă, ờ geh priă cồng den tàng broă lơh do pal ơm ờ lơh broă.

Jăt ồng Phạm Ngọc Bình, Kwang atbồ Anih dà kloh mờ kloh niam tiah kis càr Dăk Lăk yal, nàng ngui wơl ală broă lơh dà tàm ƀòn, mpồl lơh broă do gam pơgồp bal mờ UɃÑZ ală kơnhoàl, thị xã, ƀòn dờng nàng bơyai sền wơl, bơ̆t bơtà gùng dà broă lơh niam wơl; mờ tơnguh broă lam sồr nàng làng bol in wă bè bơta kwơ bơh broă ngui dà kloh. Bè jŏ jòng càr pal geh broă lơh gùt mpồl bơtiàn tus bal broă lơh ai dà ngui sa, bơcri priă ală broă lơh geh bơta kwơ di pal rơlao: “Tàm tơngai tus mờ geh bơcri priă, den ală mpồl lơh broă geh jào lơh tờm bơcri priă pal kơlôi sơnơng lơh bè lơi nàng ală broă lơh dà geh bơta pràn di pal bơh bè ờs ha là dờng rơlao, khà hìu geh ngui uă rơlao, bơh tŭ hơ̆ khà priă bơcri geh gơmù ờ uă rơlao, ai tàm broă lơh geh cồng nha rơlao. Broă jào mpồl lơh broă kung kwơ màng, pal lam sồr ală mpồl lơh sa kă bro geh bơta pràn tus bal blơi broă lơh nàng mpồl lơh broă do tus bal tàm gah do blơi broă lơh, atbồ mờ lơh broă di jăt mờ kơrnoăt geh ai”.

Cau cih Tuấn Long-Cau mblàng Ndong Brawl