Kàl rơlô bơkang nam 2023 do là dơ̆ ơm rlô pal kah ngan gơwèt mờ oh Huỳnh Tấn Đạt, bơsram ơdŭ 05, Hìu bơsram kấp 1 Lê Hồng Phong, kơnhoàl M’Drăk, tŭ geh mè bèp ai tus bal dơ̆ sền gĭt lơh Kảñ sát Rcang sơndră mờ crùh ồs sa tàm Anih tờm đơng lam Kảñ sát rcang sơndră mờ crù ồs sa mờ dong kờl rềs àr Kwang àng càr Dăk Lăk dê. Tàm dơ̆ sền gĭt do, oh Đạt geh đì tàm rơndeh crùh ồs sa, dŭi ding crùh ồs sa bal mờ ală cau ling Kảñ sát rcang sơndră crùh ồs sa mờ lơh jat ală bơta chài crùh dà gơ sơ̆t ồs; lik klàs tiah ngòt rơngơ̆t tàm ală bơta gơlik geh trồ tiah lơh aniai ồs sa. Oh Huỳnh Tấn Đạt đơs:“Tus bal tàm ơdŭ bơto bơtê bơta chài, oh neh bơsram geh broă lik klàs tiah ngòt rơngơ̆t lik bơh tiah ồs sa, mờ bơsram tai geh uă bơta gơ kờñ uă ndai tai”.

 Kung tus bal tàm dơ̆ sền gĭt lơh Kảñ sat rcang sơndră mờ crùh ồs sa, oh Nguyễn Ngọc Quỳnh Anh, kơnòm bơsram ơdŭ 05, Hìu bơsram kấp dùl Hoàng Việt, ƀòn dờng Buôn Ma Thuột, đơs:“Ngai do là dơ̆ sơn rờp kòn geh ià ding xìt dà nàng crùh ồs sa, oh chờ hờp ngan. Bơh dơ̆ sền gĭt do, kòn kờñ ngan broă lơh bơh ală wa ling crùh ồs sa dê”.

Bơdìh mờ ală ơdŭ bơsram jơnau gĭt wă ndai tai, halà nàng kơnòm dềt in nhơl is tàm hìu, bàr pe nam rê wơl hờ ndo, ală hìu bơnhă mờ hìu bơsram tàm càr Dăk Lăk neh sền gròi rlau tai tus broă ai kơnòm dềt in tus bal ală broă lơh đah bơdìh bè jòi gĭt ù tiah, kah yau; sền gĭt lơh cau lơh broă sa; ală ơdŭ bơto bơtê chài is; bơsram tàm mpồl ling klàng; ling dà lềng; ling crùh ồs sa; sàl rơlô bơkang jơnau đơs dà Mỹ; ală ơdŭ bơto re da, tàp võ, nhơl blai tơrnò, coh plai... Bi Nguyễn Văn Hiển, ơm tàm sơnah ƀòn Tân Lập, ƀòn dờng Buôn Ma Thuột đơs là ală sền gĭt bè hơ̆ rơ̆p dong kwơ ai ală oh kòn in uă ngan. Bi Nguyễn Văn Hiển, đơs:“Kơ̆p kờñ bơh hìu bơnhă dê là lời ală sau in geh tiah nhơl geh kwơ, dơ̆ 2 là ai ală sau in gĭt, sền gĭt mờ dờp geh ală jơnau gĭt wă geh ngan. Ală bơta chài geh ngan do rơ̆p lòt bal mờ ală kòn tàm rài kis. Do ngan là broă lơh geh kwơ, dong kơnòm dềt geh sền gĭt mờ dờng pràn tơl làm rlau tai”.

Càr Dăk Lăk tŭ do geh pơgap 508 rơbô nă kơnòm dềt, jơnau kờñ tus bal ală ơdŭ bơsram bơta chài tàm kàl rơlô bơkang là uă ngan. Mò Nguyễn Thị Thúy Hiền, phó Kwang atbồ Hìu Niam chài Ơruh pơnu, kơnòm pa tàu mờ kơnòm dềt càr Dăk Lăk (gơwèt Tỉñ đoàn càr Dăk Lăk dê) pà gĭt, ngai sơlơ geh uă mè bèp dan cih mat ai oh kòn in tus bal tàm ală khoă bơsram bơta chài kis, bơta niam chài đơs crih tam ya, tàp pràn să jan; sền gĭt lơh cau ling, ling crùh ồs sa, ling dà lềng. Lơh geh jơnau kờñ hơ̆, kàl rơlô bơkang nam 2023 do, mpồl lơh broă neh pờ rlau 100 ơdŭ bơsram ală bơta mờ neh gơ hòi gơ jà mờr 5 rơbô nă kơnòm dềt tàm ƀòn dờng Buôn Ma Thuột, ală kơnhoàl rềp bal bè Buôn Đôn, Cư M’gar, Krông Pách... Jat mò Hiền, bơh tŭ do tus jơh kàl rơlô bơkang, rơ̆p geh tai uă broă lơh geh kwơ ai kơnòm dềt tàm ală kơnhoàl tàm gùt càr in.

Mò Nguyễn Thị Thúy Hiền, đơs: “Rcang ai ală broă lơh kàl rlô bơkang nam 2023, Tỉñ đoàn neh lam lơh ală broă lơh lơh broă kàl rlô bơkang ai ală mpồl lơh broă kơnhoàl, thị xã, ƀòn dờng in nàng bơyai lơh ală broă lơh ơdŭ bơsram kàl rơlô bơkang tơlir ai jơh ală kơnòm dềt tàm ù tiah càr Dăk Lăk in. Jat bơta jat sền bơh bol añ dê mờ neh sền gŏ, uă mpồl lơh broă neh pờ ală ơdŭ bơsram, broă lơh kàl rlô bơkang ai ală kơnòm dềt in tus bal sền gĭt di pal mờ ală sơnam mờ jơnau kờñ bơh ală kơnòm dềt, bal mờ ală bơta geh ngan tàm tơl mpồl lơh broă dê. Ngan là, ală Huyện đoàn Krông Ana, Krông Pách halà thị xã Buôn Hồ neh bơyai lơh ală broă lơh geh ngan ai ală kơnòm dềt in bơsram re dà ờ sa priă, bơsram bơta niam chài đơs crih tam ya, bơyai lơh ală broă lơh nhơl ñiŏ đah bơdìh ai ală kơnòm dềt in...”.